Міністарка працы распавяла, як беларусаў за мяжой будуць запісваць у «дармаеды»
205- 18.05.2018, 9:24
- 139,668
Выступ Ірыны Касцевіч выклікаў шмат пытанняў.
На пасяджэнні «палаткі», якое прайшло ў чацвер, 17 траўня, міністарка працы і сацыяльнай абароны Ірына Касцевіч распавяла пра тое, як працуе новы дэкрэт аб «дармаедстве». Згодна з дакументам, у кожным раёне запрацуюць спецыяльныя камісіі, якія будуць складаць спісы «дармаедаў». Яны з'явіліся яшчэ ў мінулым годзе, калі дзейнічаў папярэдні дэкрэт, але цяпер стануць асноўным звяном у працы з «дармаедамі».
У журналістаў з’явілася шмат пытанняў аб тым, як будзе працаваць новае фінансавае пакаранне для «дармаедаў» - поўная аплата некаторых камунальных паслуг (падагрэву вады, цяпла і газу ў дамах з калонкамі).
Выданне kp.by сабрала адказы міністаркі на самыя актуальныя з іх.
- Як тыя, хто жыве за мяжой, будуць даводзіць, што яны не «дармаеды»?
- Калі чалавек падасць дакумент, што ён працуе за мяжой, будзе пастаўленая адпаведная пазнака (у базе звестак. - Рэд.) - і ён не будзе плаціць поўны кошт камунальных паслуг. Чалавек у электронным выглядзе зможа паведаміць, што ён працуе ў іншай краіне на такім-та прадпрыемстве. Гэтая практыка была і з папярэднім дэкрэтам, яна вельмі добра сябе зарэкамендавала, - патлумачыла Ірына Касцевіч.
- Ён павінен будзе падаць нейкі дакумент? - удакладнілі журналісты.
- Працоўную дамову, даведку аб заробку.
- А проста пячаткі аб перасячэнні мяжы недастаткова?
- Не-не. Перасекчы мяжу можна з рознымі мэтамі, ты павінен пацвердзіць, што працуеш за мяжой, а гэта працоўная дамова.
- А калі ён вучыцца? А калі жыве, але не працуе за мяжой?
- Давайце так. Мы цяпер адпрацуем з аблвыканкамамі пералік цяжкіх жыццёвых сітуацый і зробім памятку ў дапамогу ўсім камісіям. Да 1 чэрвеня ўсе аблвыканкамы зададуць нам свае пытанні, плюс прапановы да пералiку цяжкіх жыццёвых сітуацый. А мы за чэрвень адпрацуем у міністэрстве дзве сур'ёзных памяткі, якія будуць настольнай кнігай для камісій - у плане цяжкіх жыццёвых сітуацый і ў плане адказу на тыя пытанні, якія з'яўляюцца падчас работы камісій.
- Для чаго наогул патрэбныя камісіі, калі ў краіне ёсць службы занятасці? Яны не спраўляюцца са сваімі абавязкамі?
- У краіне створана служба занятасці, мэта і задачы якой - зніжэнне напружанасці на рынку працы і прадастаўленне вакантных працоўных месцаў. Але мэта стварэння камісій - перш за ўсё каардынацыя працы, і туды ўвойдуць прадстаўнікі шэрагу службаў: МУС, падатковых органаў, службы занятасці. І паколькі адная з задач дэкрэта - гэта стымуляванне занятасці праз поўную кампенсацыю выдаткаў (на камунальныя паслугі. - Рэд.), то фармаванне спісаў грамадзян, якія не занятыя, - гэта вельмі сур'ёзна, гэта функцыя, якую можна выконваць выключна камісійна.
- Чаму ў іншых краінах беспрацоўным плацяць дапамогу, а ў нас караюць іх рублём?
- Тыя, хто сёння стаіць на біржы працы і зарэгістраваны ў якасці беспрацоўнага, не будуць аплачваць паслугі поўным кошце, бо ў іх сапраўды цяжкая жыццёвая сітуацыя, яны страцілі працу, проста яны звярнуліся да дзяржавы па дапамогу - выканаць ім паслугу ў пошуку працы. І дзяржава будзе гэтымі паслугамі займацца, - патлумачыла Ірына Касцевіч.
- Калі ўсе беларусы пачнуць аплачваць стоадсоткавую камуналку, за што тады будуць цалкам плаціць дармаеды?
- Давайце мы пачнём рэалізоўваць той дэкрэт, які прыняты цяпер. А практыка пакажа, як ён будзе дзейнічаць, - адказала Ірына Касцевіч.
- Неўзабаве з'явіцца база звестак дармаедаў, да якой будзе мець доступ шмат службаў - камісіі, МУС і гэтак далей. Гэта не парушэнне правоў чалавека?
- З асабістых звестак там толькі вашае прозвішча., дата нараджэння, дзе вы жывяце і ваш стан - працуеце ці не працуеце. Мы распрацоўваем сёння пытанне, як пераходзіць на электронныя працоўныя кніжкі. Акурат актуалізацыя баз працаздольных грамадзян - гэта першы крок да пераходу. Гэта ўжо, прабачце, база звестак онлайн-рэжыму: сёння звольніўся - сёння ты трапляеш у базу звестак загадам такімт-та. Гэта будучыня, мы жывем у XXI стагоддзі, усё павінна быць аўтаматызавана.
Нагадаем, 25 студзеня Лукашэнка падпісаў дэкрэт №1. У новы дэкрэт не ўвайшлі нормы аб збіранні з працаздольных непрацоўных грамадзян збору на фінансаванне дзяржаўных выдаткаў. На месцах будуць створаныя спецыяльныя камісіі, якія будуць збіраць інфармацыю пра «дармаедаў».
Працаздольныя грамадзяне, не занятыя ў эканоміцы, аплачваюць коштамі (тарыфамі), якія забяспечваюць 100% кампенсацыю выдаткаў, наступныя камунальныя паслугі:
гарачае водазабеспячэнне, газазабеспячэнне пры наяўнасці індывідуальных газавых ацяпляльных прыбораў, цеплазабеспячэнне.
Пастанова ўваходзіць у дзеянне з 1 студзеня 2019 года.
Нагадаем, што папярэдняя версія дэкрэта выклікала масавыя пратэсты сярод насельніцтва.