22 лютага 2019, Пятніца, 16:28
Заклік Рады БНР
Рубрыкі

МЗС Японіі: Нельга зрабіць памылку з выбарам часу для паслаблення санкцыяў супраць КНДР

Міністр замежных справаў Японіі Тара Кона заклікаў міжнародную супольнасць прадаўжаць ціск на Пхеньян.

Міжнароднай супольнасці нельга рабіць памылак з выбарам часу для паслаблення санкцыяў у дачыненні да КНДР, неабходна прадаўжаць ціск, пакуль не будуць зробленыя канкрэтныя дзеянні ў дэнуклеарызацыі. Пра гэта ў нядзелю заявіў кіраўнік МЗС Японіі Тара Кона, выступаючы ў японскім культурным цэнтры ў бразільскім Сан-Паўлу, паведамляе ТАСС.

"Неабходна, каб міжнародная супольнасць прадаўжала ціск на Паўночную Карэю, пакуль тая не распачне канкрэтных дзеянняў у кірунку дэнуклеарызацыі. Нам нельга памыліцца з часам для паслаблення санкцыяў супраць Паўночнай Карэі", – прыводзіць ягоныя словы агенцтва Kyodo.

У пачатку гэтага года на фоне правядзення ў паўднёвакарэйскім Пхёнчхане Алімпійскіх гульняў пазначылася змякчэнне сітуацыі на Карэйскім паўвостраве, а таксама пацяпленне ў стасунках паміж Сеулам і Пхеньянам. Пазней бакі правялі сустрэчу на найвышэйшым узроўні з удзелам прэзідэнта Паўднёвай Карэі Мун Чжэ Іна і дыктатара КНДР Кім Чэн Ына. Як чакаецца, 12 чэрвеня з паўночнакарэйскім лідарам павінен сустрэцца прэзідэнт ЗША Дональд Трамп.

Тым не менш 16 траўня першы намеснік кіраўніка МЗС КНДР Кім Ге Гван заявіў, што Пхеньян можа не пагадзіцца на ўдзел у саміце з ЗША, калі яны прадоўжаць патрабаваць дэнуклеарызацыі Карэйскага паўвострава ў аднабаковым парадку. За дзень да гэтага ўлады КНДР адмянілі перамовы на высокім узроўні з Паўднёвай Карэяй праз пачатак амерыкана-паўднёвакарэйскіх ваенна-паветраных вучэнняў Max Thunder.