CNBC паведаміў аб адмоўных выніках тэстаў ракет, пра якія казаў Пуцін
8- 22.05.2018, 16:55
- 15,657
Усе чатыры выпрабаванні найноўшых расейскіх ракет з ядзернай устаноўкай скончыліся няўдала.
Усе чатыры выпрабаванні найноўшых расейскіх ракет з ядзернай устаноўкай, праведзеныя з лістапада 2017-га да лютага 2018 года, скончыліся няўдала. Пра гэта паведамляе «Радыё Свабода» са спасылкай на амерыканскі тэлеканал CNBC.
Падчас найбольш паспяховага з гэтых тэстаў ракета праляцела блізу 35 кіламетраў, затым кантроль над ёй быў страчаны, і яна ўпала. Са слоў крыніц тэлеканала ў амерыканскай выведцы, падчас выпрабаванняў не спрацавала ядзерная ўстаноўка. Суразмоўцы CNBC адзначаюць, што на іспытах намагалі ў Крамлі, хоць канструктары папярэджвалі, што сістэма яшчэ не гатовая.
Прэс-сакратар прэзідэнта Расеі Дзмітрый Пяскоў у каментары паведамлення аб няўдалых выпрабаваннях расейскіх крылатых ракет, заявіў, што ў гэтым пытанні неабходна верыць Уладзіміру Пуціну.
«Слухайце прэзідэнта Расейскай Федэрацыі Уладзіміра Пуціна і верце яму», - прыводзіць «Інтэрфакс» словы Пяскова.
Падчас выступу 1 сакавіка з пасланнем Федэральнаму сходу прэзідэнт Уладзімір Пуцін паведаміў, што ў Расеі з'явілася крылатая ракета, здольная даставіць боегалоўку ва ўсякі пункт планеты і не патрапіць пад удар сістэм СПА.
«Новая крылатая ракета будзе валодаць неабмежаваным радыусам дзеяння і непрадказальнай траекторыяй палёту. Яна непаражальная для ПРА і СПА», - сказаў Пуцін.
Пазней стала вядома, што для ілюстрацыі дзеяння міжкантынентальнай балістычнай ракеты «Сармат» у выступе Пуціна выкарыстоўвалі кадры з кампутарнага роліка 11-гадовай даўніны, дзе паказана, як ядзерная ракета паражае штат Фларыда. З паведамленняў СМІ, нягледзячы на заявы Пуціна, «Сармат» знаходзіцца на пачатковых этапах выпрабаванняў.