The Washington Post: На крок бліжэй да сапраўднай гісторыі МН17

Cледчыя прасоўваюцца наперад.

«Калі 17 ліпеня 2014 года над разадранай вайной Усходняй Украінай быў збіты самалёт рэйса 17 Malaysia Airlines, загінулі 298 чалавек, якія ляцелі з Амстэрдама ў Куала-Лумпур. Да сённяшняга дня ніхто так і не закліканы да адказнасці - але следчыя прасоўваюцца наперад.

На гэтым злачынстве бачныя адбіткі пальцаў Расеі, і яна паводзіла сябе ганебна перад тварам довадаў», - гаворыцца ў рэдакцыйным артыкуле The Washington Post, (пераклад - inopressa.ru).

У выніку шматнацыянальнага крымінальнага расследавання пад кіраўніцтвам галандцаў на мінулым тыдні была зробленая заява, што ракета класа «зямля-паветра», якая знішчыла самалёт, была выпушчаная з рэактыўнай устаноўкі, што базавалася ў расейскай вайсковай частцы, піша выданне. У рамках асобнага расследавання, якое праводзіцца журналістамі паводле матэрыялаў адкрытых крыніц, на чале арганізацыяй Bellingcat, была ўстаноўленая асоба афіцэра расейскай вайсковай выведкі, голас якога чутны на запісе адной з перахопленых тэлефонных перамоў, падчас якіх абмяркоўвалася размяшчэнне ракеты.

«Гэты чалавек ідэнтыфікаваны журналістамі як афіцэр ГРУ Алег Іваннікаў», - гаворыцца ў артыкуле.

Расейскія афіцыйныя асобы ілжыва заяўлялі, што ракета, магчыма, была выпушчаная з украінскіх узброеных сіл; або што MH17 быў збіты украінскім знішчальнікам; або што ракетная ўстаноўка фактычна знаходзілася ў кантраляванай Украінай вобласці, а не ў рэгіёне, дзе Расея справакавала сепаратысцкую вайну супраць Украіны. Для падмацавання апошняй версіі расейцы нават сфабрыкавалі тэкст на рэкламным шчыце, які быў паказаны на відэа, гаворыцца ў артыкуле.

«Гэтая катастрофа выразна паказала, у якіх маштабах Расея гатовая выкарыстаць падман і дэзінфармацыю, абы ўхіліцца ад адказнасці за свае дзеянні. Нельга дапусціць, каб такія метады перашкаджалі расследаванню падзення самалёта. Таксама нельга дазволіць, каб яны раз'ядалі адкрытыя грамадствы, у якіх цэняцца праўда і захаванне закона», - робяць выснову аўтары артыкула.