У Расеі праходзяць акцыі супраць падвышэння пенсійнага ўзросту

Сёння на мітынг выйшлі сотні жыхароў Краснаярска.

Сотні чалавек выйшлі сёння ў Краснаярску на ўзгоднены мітынг супраць пенсійнай рэформы. Ён прайшоў на ўскраіне горада ў спальным раёне. Удзельнікі акцыі таксама пачалі збор подпісаў супраць падвышэння пенсійнага ўзросту, паведамляе «Радыё Свабода». Яго плануюць правесці ў розных раёнах краю.

Мітынгоўцы патрабавалі стварыць новыя працоўныя месцы, перш чым падвышаць пенсійны ўзрост. Прадстаўнік рэгіянальнага прафзвязу Сяргей Лядоўскі заявіў, што ў рэзалюцыі мітынгу прапануецца не праводзіць пенсійную рэформу ў тым выглядзе, у якім яе прапануе ўрад Расеі. У арганізацыі ёсць альтэрнатыўная праграма, асноўны яе пункт - арганізацыя 2 мільёнаў новых працоўных месцаў.

На плакатах, якія трымалі пратэстоўцы, былі лозунгі «Здохнем дружна на працы!», «Годзе прыніжаць маё пакаленне», «Пенсіянер гучыць горка», «Няньчыць унукаў, а не батрачыць».

Выступоўцы таксама звярнулі ўвагу на статыстыку, згодна з якой цяпер сярэдняя працягласць жыцця мужчын у краі складае 64,5 года. Моладзь, якая ўдзельнічае ў акцыі, заявіла «Проспекту Мира», што да пенсіі яны могуць не дажыць. «Ды і каму яна потым патрэбная будзе? Так надарвешся, што ніякай пенсіі на лекі не выстарчыць», - паведаміў адзін з удзельнікаў.

У розных гарадах Расеі цяпер ідзе падрыхтоўка да новых мітынгаў. Жыхары Іжэўска запланавалі на чэрвень і ліпень не менш за чатыры акцыі ды пікет перад рэзідэнцыяй Кіраўніка Удмурцкай Рэспублікі і тры мітынгі, адзін з якіх павінен адбыцца 1 ліпеня. Яшчэ адзін вызначаны на 20 ліпеня і пройдзе ў рамках усерасійскай кампаніі «НАРОД СУПРАЦЬ падвышэння пенсійнага ўзросту».

Апазіцыянер Аляксей Навальны таксама абвясціў аб правядзенні ў гарадах Расеі акцый пратэсту 1 ліпеня. Заяўкі пададзеныя ў 20 гарадах: Бійску, Краснаярску, Камсамольску-на-Амуры, Новакузнецку, Новасібірску, Томску, Хабараўску і г.д..

У Казані мітынг супраць падвышэння пенсійнага ўзросту пройдзе 30 чэрвеня ў Юдзіне. Яго ладзіць «Справядлівая Расія». У Новакуйбышаўску Самарскай вобласці мітынг плануецца правесці 1 ліпеня. Яго арганізуе КПРФ.

Напярэдадні стала вядома, што дэпутаты Заканадаўчага Пермскага краю падпісалі ліст-праект прэзідэнта з просьбай падвысіць пенсійны ўзрост. Журналіст Яўген Плотнікаў паведаміў, што свае подпісы поўным складам паставілі дэпутаты ад «Адзінай Расеі», у той час як ЛДПР і КПРФ устрымаліся. На думку Плотнікава, менавіта так у расейскіх рэгіёнах будзе фармавацца «меркаванне з месцаў» у будучай рэформе.

Раней кіраўнік Партыі пенсіянераў Расеі Мікалай Чабатароў падтрымаў прапанаваную ўрадам пенсійную рэформу, заявіўшы, што падвышэнне пенсійнага ўзросту забяспечыць рост пенсій.

Урад Расеі прапаноўвае падняць узрост выхаду на пенсію да 65 гадоў для мужчын і 63 гадоў для жанчын. Прэм'ер-міністр РФ Дзмітрый Мядзведзеў заявіў, што рэформа павінна ажыццяўляцца паэтапна. Адпаведны законапраект Дзяржаўная дума ў першым чытанні разгледзела 14 чэрвеня. Пазней стала вядома, што Крэмль можа змякчыць пенсійную рэформу праз боязь акцый пратэсту.

Паводле звестак УЦДГМ, за чэрвень, у сярэдзіне якога ўлады абвясцілі аб пенсійнай рэформе, а таксама аб падвышэнні стаўкі ПДВ, узровень адабрэння дзейнасці прэзідэнта РФ Пуціна і прэм'ера Дзмітрыя Мядзведзева знізіўся на 8 і 15 адсоткаў адпаведна.