Каталонія разарвала пратакольныя стасункі з каралеўскім дваром Гішпаніі

Ніхто з сябраў каталонскага ўрада больш не будзе ўдзельнічаць у мерапрыемствах каралеўскага двара.

Каталонская ўлада ў пятніцу заявіла, што разрывае пратакольныя стасункі з каралеўскім дваром Гішпаніі з прычына таго, што кароль дагэтуль не папрасіў прабачэння за «пакрыванне гвалту» падчас рэферэндуму за незалежнасць рэгіёну летась.

Пра гэта паведамляе «Европейская правда» са спасылкай на гішпанскае выданне El Mundo.

Кіраўнік Жэнералітэту (урада) Каталоніі Кім Тора паведаміў, што ніхто з сябраў каталонскага ўрада больш не будзе ўдзельнічаць у мерапрыемствах, арганізаваных гішпанскім каралеўскім дваром.

Акрамя таго, каталонскі ўрад не будзе запрашаць прадстаўнікоў каралеўскага двара на арганізаваныя Каталонскімі ўладамі мерапрыемствы.

Тора таксама наважыў пакінуць пасаду ганаровага віцэ-прэзідэнта фонду прынцэсы Жыронскай, адным з апекуноў якога з'яўляецца кароль Гішпаніі.

Як патлумачыў Тора, Каталонія да апошняга спадзявалася, што «кароль падумае і папросіць прабачэння за тое, што пакрываў жорсткасць» на рэферэндуме аб незалежнасці Каталоніі.

«27 верасня мы абвясцілі незалежнасць, мы хочам, каб волю людзей паважалі, мы не падданыя», - сказаў Тора.

У той жа час Тора ўсё-такі возьме ўдзел у адкрыцці Міжземнаморскіх гульняў у каталонскім горадзе Тарагона з удзелам караля Філіпа VI. Падчас мерапрыемства Тора перадасць гішпанскаму манарху справаздачу аб «гвалце на рэферэндуме», падрыхтаваным амбудсменамі Каталоніі.