Расея рыхтуецца да канфіскацыі актываў у ЗША

Расейскія ўлады надумалі не спакушаць лёс.

Расейскія ўлады спадзяюцца, што ўзаемная сімпатыя Уладзіміра Пуціна і Дональда Трампа прывядзе да збліжэння з ЗША. Але спакушаць лёс яны не хочуць, піша finanz.ru са спасылкай на Bloomberg.

Мяркуючы з звестак Міністэрства фінансаў ЗША, апублікаваных на гэтым тыдні, Расея рэкорднымі тэмпамі ліквідуе даляравыя актывы, прадаўшы за два месяцы чатыры пятыя казначэйскіх аблігацый ЗША са свайго партфеля – у агульнай колькасці на $81 мільярд. Продажы пачаліся ў красавіку, калі ЗША наклалі самыя жорсткія на гэты момант санкцыі на хаўруснікаў Пуціна.

Статыстыка ўзбурыла рынкі, паколькі ні Мінфін ЗША, ні Банк Расеі не каментуюць транзакцыі. Акрамя таго, звесткі недастаткова празрыстыя, і цяжка зразумець, ці сапраўды Расея скінула львіную дзель амерыканскіх актываў, ці проста пераклала іх на захоўванне за межы ЗША, каб схаваць уласнасць.

Спосаб застрахавацца

Аднак Сяргей Дубінін, які ўзначальваў Цэнтрабанк РФ у 1995–1998 гады, не бачыць у дзеяннях манетарных уладаў ніякай таямніцы – паводле ягоных словаў, "гэта спроба застрахаваць сябе" ад канфіскацыі актываў, якая здаецца ўсё больш верагоднай. Расея вынесла ўрок з сітуацыі з Іранам і канвертуе даляравыя актывы ў іншыя валюты, каб засцерагчы свае рэзервы ад пагрозы замарожвання, сказаў ён.

"Навошта дзяржаўныя аблігацыі больш надзейныя мяняць на дэпазіт у нейкім банку", – сказаў Дубінін, які цяпер уваходзіць у назіральную раду Групы ЗГБ. Паводле ягоных словаў, улады, хутчэй за ўсё, пераводзяцца ў іншыя канвертоўныя валюты, еўры і ены.

Цэнтрабанк апублікуе свежыя звесткі пра свае замежныя ўкладанні пазней сёлета, але ўжо ёсць прыкметы таго, што Дубінін, можа быць, мае рацыю. Штомесячная статыстыка на сайце рэгулятара паказвае, што дэпазіты ў іншых цэнтрабанках, міжнародных інстытутах і замежных банках павялічыліся на суму, эквівалентную $47 мільярдам, у красавіку-траўні.

Сказаць, у якіх валютах былі размешчаныя гэтыя дэпазіты, немагчыма, але старшыня Банка Расеі Эльвіра Набіуліна ў мінулым месяцы казала расейскім парламентарыям, якія выказалі асцярогі з нагоды памеру ўкладанняў у пазыку ЗША, што Цэнтрабанк знаходзіцца ў працэсе дыверсіфікацыі свайго партфеля.

Даляравыя патрэбы

Пуцін даўно асуджаў "манапольнае даляравае становішча", якое дазваляе ЗША "паразітаваць" на сусветнай эканоміцы і "жыць не на сродкі". Пасля інаўгурацыі на чацвёрты прэзідэнцкі тэрмін у траўні ён сказаў, што "адрыў" ад даляра неабходны для ўмацавання "эканамічнага суверэнітэту" Расеі.

Аднак сказаць гэта прасцей, чым зрабіць, для краіны, асноўныя экспартныя тавары якой – нафта і газ – намінаваныя ў далярах. Акрамя таго, Цэнтрабанк павінен падтрымліваць пэўны ўзровень амерыканскай валюты ў рэзервах, каб дапамагаць банкам кіраваць ліквіднасцю і мець магчымасць пры неабходнасці здзяйсняць інтэрвенцыі на валютным рынку.

Апошні раз Расея забірала такую вялікую суму з ЗША неўзабаве пасля далучэння Крыма ў 2014 годзе: тады Цэнтрабанк вывеў з Федэральнага рэзервовага банка Нью-Ёрка блізу $115 мільярдаў, паведамляў летась Рэйтэр са спасылкай на былых чыноўнікаў ФРС. Асноўная частка гэтых сродкаў была вернутая праз некалькі тыдняў, калі стала ясна, што першапачатковыя санкцыі ЗША будуць не такія маштабнымі, як чакаў Крэмль, паведамляла інфармагенцтва.