Пампеа параўнаў іранскія ўлады з мафіяй

Вашынгтон будзе падтрымліваць «даўно ігнараваны голас іранскага народа».

Кіраўнік амерыканскага Дзярждэпу Майк Пампеа заявіў, што Іран сёння «кіруецца нечым, што больш нагадвае мафію, чым урад». Такі пункт гледжання ён выказаў, выступаючы ў Фондзе Рональда Рэйгана ў Каліфорніі, паведамляе Reuters.

Сваё меркаванне ён патлумачыў, намякнуўшы на згаданыя ім раней «незлічоныя багацці» кіраўнікоў Ірана і ўласцівую ім, на думку Пампеа, карупцыю. Іранцы, як мяркуе дзяржсакратар ЗША, павінны самастойна вызначыць кірунак для сваёй краіны. А пакуль яны гэта робяць, Вашынгтон «падтрымае даўно ігнараваны голас іранскага народа», запэўніў Пампеа.

Урад ЗША, як апавёў таксама кіраўнік амерыканскай вонкавапалітычнай установы, збіраецца запусціць кругласутачны (24/7) канал і радыёстанцыю на фарсі, «каб ахапіць іранскую аўдыторыю ў Іране і ва ўсім свеце».

Амерыканскі прэзідэнт Дональд Трамп у пачатку траўня абвесціў пра выхад Штатаў з ядзернай угоды з Тэгеранам. Гэтае пагадненне было падпісанае ў 2015 годзе паміж Іранам і краінамі «Шасцёркі» – ЗША, Вялікай Брытаніяй, Францыяй, Нямеччынай, Расеяй і Кітаем. Дамоўленасць прадугледжвала паэтапнае зняцце эканамічных санкцый з Тэгерана ў абмен на згортванне ім сваёй ядзернай праграмы. Аднак Трамп, апынуўшыся ва ўладзе, неаднаразова крытыкаваў гэтае пагадненне і называў ядзерную ўгоду з Іранам горшай. Тэгеран, на ягоную думку, не выконваў умоваў пагаднення, аднак эксперты з Міжнароднага агенцтва атамнай энэргіі (МАГАТЭ) гэтыя звесткі не пацвярджала.

Тым не менш ЗША прынялі пастанову выйсці з гэтага пагаднення. Пасля гэтага Вашынгтон абвесціў пра аднаўленне ўсіх прынятых ім раней санкцый у дачыненні да Ірана. Згодна з імі, да лістапада ЗША ўвядуць захады супраць іранскай прамысловасці, гандлю і золатаздабывальнага прамысловасці, а таксама паліўна-энэргетычнага комплексу. Гэта, як ацэньваў 2 ліпеня дырэктар аддзела палітычнага планавання Дзярждэпартамента ЗША Браян Хук, прымусіць сысці з Ірана 50 замежных арганізацый. «Наша мэта, – як прызнаваўся ён тады, – узмацніць ціск на іранскі рэжым, скараціўшы да нуля ягоныя прыбыткі ад продажаў сырой нафты».

У Тэгеране ў адказ на гэта прыгразілі заблакаваць пастаўкі нафты ў Персідскім заліве.