Пінчук аднёс прадукты абаронцам Курапатаў - і стаў «героем дня» на радзіме

Мясцовыя ўлады спалохаліся ўчынку Руслана Гусейнава.

У чэрвені пінчук Руслан Гусейнаў прыехаў па справах у Менск. Увечары наважыў заехаць у Курапаты і адвезці прадукты знаёмай журналістцы, якая асвятляла падзеі каля рэстарацыі «Поедем поедим», паведамляе «Медиа-Полесье».

У тыя дні актывісты ладзілі інфармацыйныя акцыі для наведвальнікаў гэтай установы грамадскага харчавання і тлумачылі, што даслоўна за некалькі метраў знаходзяцца масавыя пахаванні многіх тысяч нявінна забітых людзей.

Руслан пагаварыў з абаронцамі Курапатаў, зрабіў некалькі стрымаў для свайго FB-канала і стаў сведкам таго, як аўтамабіль аднаго з наведвальнікаў ледзь не наехаў на чалавека. Гэты момант пінчук стаў здымаць на смартфон, кіроўцу аўто гэта не спадабалася, і ён выбіў тэлефон з рук Руслана, смартфон зваліўся на асфальт і разбіўся.

На месца здарэння была выкліканая міліцыя, і Руслан Гусейнаў напісаў заяву аб пашкоджанні маёмасці.

Супрацоўнікі Бараўлянскага РАУС правялі праверку на заяву пінчука і не сталі заводзіць справу аб адміністрацыйным правапарушэнні ў сувязі з тым, што ў дзеяннях кіроўцы не было злога намеру пашкодзіць ягоную маёмасць.

Аднак прыгоды Руслана гэтым не скончыліся, і ён атрымаў позву з’явіцца ў адзін з менскіх судоў у якасці асобы, у дачыненні да якой вядзецца адміністрацыйны працэс паводле арт.23.34 КаАП «Парушэнне парадку арганізацыі або правядзення масавых мерапрыемстваў».

У тэксце пратакола аб адміністрацыйным правапарушэнні была наступная фармулёўка: Гусейнаў «узяў актыўны ўдзел у складзе групы грамадзян у пікетаванні, без адпаведнага дазволу Менскага райвыканкаму, з мэтай публічнага выказвання стаўлення да функцыянавання рэстарацыі «Поедем поедим», падчас якога дэманстратыўна стаяў каля брамы рэстарацыі на фоне бел-чырвона-белага сцяга».

На розныя прычыны адміністрацыйная справа была перададзеная ў суд горада Пінска і Пінскага раёна.

Суд, даўжынёй тры дні

13 жнiўня пачынаецца разгляд адміністрацыйнай справы ў дачыненні да Руслана Гусейнава. Руслан сцвярджаў, што проста падышоў да забаўляльнага комплексу і не ўдзельнічаў ні ў якіх пікетах, ён заявіў мноства хадайніцтваў, практычна ўсе яны былі задаволеныя судом.

Суддзя высвятляў прычыны і абставіны знаходжання пінчука каля комплексу «Поедем поедим», прагледзеў відэа, прадэманстраванае праваахоўнікамі (здымка вядзецца на камеры актыўнасці каля рэстарацыі), і відэа, прадэманстраванае Русланам. Далей быў абвешчаны перапынак да наступнага дня.

На наступны дзень суддзя прыняў хадайніцтва Гусейнава аб выкліку чацвярых сведак (работніц рэстарацыі і актывістаў, якія прысутнічаюць у той дзень побач з ім). Для гэтай працэдуры быў абвешчаны перапынак да 16 жніўня.

16 жніўня высветлілася, што ніхто з заяўленых сведкаў у суд не з’явіўся. У выніку суддзя прыняў пастанову аб тым, што пінчук усё ж удзельнічаў у пікетаванні рэстарацыі і прызначыў яму пакаранне ў выглядзе штрафу сумай 10 базавых адзінак.

Па заканчэнні працэсу Руслан Гусейнаў заявіў, што будзе абскарджваць вырак Пінскага суда.