Генадзь Фядыніч: Людзі не ходзяць у пракуратуру, як у краму, па хлеб

Лідар РЭП распавёў пра ціск на сведак у «справе прафзвязаў».

На судзе паводле справы прафзвязаў частка сведак адмовілася ад сваіх паказанняў, заявіўшы, што яны атрыманыя пад ціскам і пагрозамі. Суд ініцыяваў праверку, але пасля праверкі крымінальныя справы ўсё ж не распачалі. 15 жніўня ў судзе пракурор зачытваў вынік праверкі, якая не ўстанавіла ніякага ціску на сведак з боку УДФР. Наадварот: і гэты дакумент, і наступныя пытанні пракурора зводзіліся да таго, каб давесці, што на сведак ціснуў ні хто іншы, як сам Генадзь Фядыніч. Пры гэтым прагучалі матэрыялы праслухоўвання тэлефонных размоў Фядыніча з супрацоўнікамі, узятыя 9 жніўня - ужо пасля заканчэння следства, падчас суду. Пракурор зачытаў і тыя размовы, якія не мелі ніякага дачынення да справы: напрыклад, як Фядыніч лае супрацоўнікаў за спазненне на працу.

Лідар незалежнага прафзвязу пракаментаваў praca-by.info вынікі пракурорскай праверкі:

- Праслухоўванне тэлефонаў - законнае, калі ёсць на тое санкцыя пракурора. Калі мы ўпершыню знаёміліся з матэрыяламі справы, мы бачылі дакумент, згодна з якім следства звярнулася да пракурора 14 ліпеня 2017 года, і пракурор даў санкцыю на 90 дзён праслухоўвання. Гэта значыць, тэлефоны слухалі з 15 ліпеня мінулага года. Гэтыя 90 дзён скончыліся прыкладна 15 верасня 2017 года. А пракурор зачытваў размовы ад 6 ліпеня, 11 ліпеня 8 ліпеня 2017 года... Чаму праслухоўвалі раней атрыманай санкцыі? А сёння мы яшчэ раз знаёміліся з матэрыяламі справы і не знайшлі дакументаў: хто звяртаўся да пракурора для дазволу на новае праслухоўванне? Хто выдаў пастанову праслухоўваць размовы? На колькі дзён? Няма адказу! Адвакаты таксама гэтым заклапочаныя: якім чынам?

- Прагучалі вашыя размовы з супрацоўнікамі пра час прыходу на працу, пра іншыя працоўныя пытанні... Навошта пракурор зачытваў гэтыя размовы?

- Я думаю, каб паказаць, што мы ўсё чуем і ўсё ведаем пра вас, Генадзь Фёдаравіч! Я казаў на судзе: гэта не мае да справы ніякага дачынення!

- Што яны спрабавалі давесці: што вы ціснулі на сведак?

- Давесці, што я ўплываў на паказанні сведак - гэта нонсэнс. Я на тэмы крымінальнай справы са сведкамі не размаўляў. А што тычыцца ранішняга выкліку людзей у пракуратуру 9 жніўня: мы сёння ў справе ўбачылі позвы! - выяўляецца, былі позвы, якія ніхто не ўручаў! Іх даставілі на допыты незаконным чынам! Дасталі з пасцеляў а 7 раніцы. А цяпер позвы падклалі ў справу. Калі б вы хацелі выклікаць людзей на допыт, адправілі б позвы ўчастковаму, той бы прыйшоў і сказаў: «Вам позва». Позвы з'явіліся потым! Нават допыты ў генпракуратуры нельга ўважаць законнымі, бо прывод у пракуратуру прайшоў незаконным чынам.

- Ці законна юрысту арганізацыі даваць сябрам арганізацыі парады аб тым, як ім паводзіць сябе на допытах?

- Я скажу, што гэта не проста законна - гэта павінна быць! Калі ёсць прафсаюзны юрыст, і калі ты хочаш мець хаця б мінімальнае разуменне таго, што табе рабіць... Людзі ж не ходзяць у пракуратуру і следчы камітэт, як у краму па хлеб, - для іх гэта шок! Для кожнага чалавека шок - трапіць на допыт. Вядома, яны абавязаныя ведаць! Мы на сайце размяшчалі гэтую інструкцыю, ды і павінен быць сталы лікбез прававой, каб разбірацца ў заканадаўстве.

Як можна абвінаваціць мяне ў тым, што я шукаў людзям адваката? Так, шукаў і буду шукаць - а як інакш людзям дапамагчы? Я веру на сто адсоткаў, што іх запалохвалі ва УДФР у першы дзень допыту. Шукаць адвакатаў для такіх сітуацый - больш чым нармальна: адвакат простай сваёй прысутнасцю не дазволіць ні пракурору, ні следчаму ціснуць і запалохваць людзей.