ІП: Пакупнікі часта спрабуюць вярнуць адзенне як няякаснае пасля яго выкарыстання

У прадпрымальнікаў шмат прэтэнзій да экспэртных высноў таварыства абароны спажыўцоў.

Прадпрымальнік Алег Кароль распавёў, што нярэдкія выпадкі так званага спажывецкага экстрэмізму, паведамляе агенцтва «Мінск-Навіны». Пакарыстаўшыся сезон абуткам ці адзеннем, пакупнік спрабуе вярнуць яго як няякаснае. І знаходзіць падтрымку з боку асобных таварыстваў абароны правоў спажыўцоў, якія выконваюць экспэртызу тавару і даюць часам сумнеўныя заключэнні, не давёўшы пры гэтым, што быў вытворчы брак.

- Нас хвалюе прадузятасць выстаўлення прэтэнзій ад грамадскіх арганізацый, - дадаў Кароль. - Дзейныя ДАСТы вельмі жорсткія, а довадная частка экспэртыз часта адсутнічае. Магчыма, і стандарты, і методыку ацэнкі тавару трэба ўпарадкаваць, пра што мы і просім.

- Калі два экспэрты кажуць «не брак», а трэці сцвярджае адваротнае - гэта дзіўна. Як увогуле ацэньваць тавар са ступенню зношанасці 50%? - мяркуе прадпрымальніца Таццяна Кароль.

Прыклады прыводзіла і прадпрымальніца з Гомеля Святлана Громава, у якой таксама шмат прэтэнзіяў да экспэртных высноў таварыства абароны спажыўцоў.