З рэжымам трэба размаўляць на роўных

Калі мы самі пачнём паважаць сябе, пачнуць паважаць нас і нашы ворагі.

Адказ Менгарвыканкама з нагоды памятнай шыльды на доме, у якім была абвешчана незалежнасць Беларусі Народнай Рэспублікі, стаў найбольш абмеркаваны ў байнэце ўчора, піша Telegram-канал «Баста».

Гарадскія ўлады паведамілі, што ўсталёўваць яе не будуць. «Інфармуем пра тое, што на адрас Менгарвыканкама паступіў шэраг зваротаў ад грамадзян Беларусі і прадстаўнікоў грамадскасці, якія негатыўна ставяцца да пытання ўстаноўкі памятнай шыльды на вуліцы Валадарскага, 9», - гаворыцца ў адказе, які атрымала Беларуская сацыял-дэмакратычная партыя (Грамада) ад намесніка старшыні Менгарвыканкама Ігара Юркевіча.

Адказ абсалютна лагічны і прадказальны для ўсіх, хто знаёмы з палітычнай становішчам у краіне. Было вельмі дзіўна назіраць, як быццам бы дарослыя разумныя людзі, палітыкі і актывісты цягам паўгода сур'ёзна разлічвалі на нешта іншае.

Распавядалі адзін аднаму казкі і пераконвалі сваіх прыхільнікаў, што акупацыйныя ўлады пойдуць супраць сябе, дазволяць прысутнасць варожага для іх сімвалічнага знака ў цэнтры Менска. Некаторыя яшчэ ўпэўненыя былі, што Дзень Волі святам дзяржаўным стане пры гэтым рэжыме. Наіўныя.

Устаноўка шыльды ў гонар абвяшчэння незалежнасці БНР пры ўладзе Лукашэнкі - гэта падзея прыкладна такога ж парадку, як устаноўка помніка Сталіну нямецкімі акупантамі ў Менску падчас Другой сусветнай.

Нагадаем, што казкі аб памятнай шыльдзе, добрай уладзе ды іншая фантастыка былі галоўнымі аргументамі тых, хто намагаў на адмове ад палітычнага, пратэстнага складніка святкавання Дня Волі ў гэтым годзе, тых, каго ў народзе празвалі «канцэртнай апазіцыяй».

Іх апаненты яшчэ тады казалі, што гэта немагчыма, калі апазіцыйныя палітыкі будуць паводзіць сябе, як даверлівыя дзеці, спрабавалі растлумачыць відавочнае - з рэжымам трэба размаўляць як мінімум на роўных, патрабаваць, а не прасіць, весці дыялог, а не згаджацца з загадамі танных клеркаў, дадзенымі ў курылках Менгарвыканкама.

Шчыра спадзяемся, што тыя, хто напярэдадні Дня Волі пераконваў нас усіх у адэкватнасці рэжыму, зрабілі належныя высновы з адпіскі Менгарвыканкама. Толькі калі мы самі пачнём паважаць сябе, пачнуць паважаць нас і нашы ворагі. Першае, што для гэтага трэба зрабіць, - навучыцца не верыць у прымітыўныя хітрыкі і правільна ацэньваць сваіх сяброў і сваіх апанентаў.