Мядзведзеў пра падатковы манеўр: Мы не абяцалі кампенсаваць недаатрыманыя даходы

Прэм'ер РФ заклікаў Менск «шанаваць саюзныя стасункі».

Пра гэта паведамляе «Интерфакс».

«Мы, вядома, іх заклапочанасць разумеем, і перамовы на гэтую тэму працягваем. Пры гэтым хачу яшчэ раз нагадаць, што, па-першае, мы ніколі не абяцалі кампенсаваць недаатрыманыя даходы іншых краін, хай нават самых-самых блізкіх», - сказаў Дзмітрый Мядзведзеў на нарадзе з віцэ-прэм'ерамі.

Між тым Д.Мядзведзеў таксама заявіў, што РФ аказвае Беларусі буйную крэдытную дапамогу ва ўмовах, калі ёй самой закрыты доступ на заходнія фінансавыя рынкі, і Менск павінен гэта шанаваць.

«Калі казаць пра такія дзяржавы і, перш за ўсё, гаворка ідзе пра Беларусь, мы захоўваем вельмі вялікі аб'ём крэдытнай падтрымкі нашым партнёрам», - сказаў ён на нарадзе з віцэ-прэм'ерамі.

Са слоў Д. Мядзведзева, гэты аб'ём перавышае 6,5 млрд даляраў, не ўключаючы звязаныя крэдыт на будаўніцтва АЭС. «Прычым мы не патрабуем, вядома, вяртання гэтых крэдытаў, мы пралангуем гэтыя крэдыты на просьбу нашых партнёраў ва ўмовах, нагадаю, калі для нас закрытыя фінансавыя рынкі заходніх краін», - падкрэсліў прэм'ер.

«Фактычна, мы дапамагаем, аддаючы грошы з нашай эканомікі. Гэта трэба шанаваць, разважаючы пра саюзніцкія стасункі», - дадаў ён.