У Басфоры ўтварыліся самыя доўгія з 2014 года чэргі з танкераў

У Чорным моры затрымаліся танкеры, што везлі ў парты Міжземнамор'я 39 млн бар. расейскай і казахстанскай нафты.

Танкеры, якія перавозяць расейскую і казахстанскую нафту з чарнаморскіх партоў, стаяць у чэргах на праход праз пратокі Басфор і Дарданелы, што затармазіла дастаўку мільёнаў барэляў нафты для НПЗ у Міжземнаморскім рэгіёне. Пра гэта паведамляе Bloomberg.

Паводле звестак агенцтва, пагрузкі ў расейскім порце Наварасейск і найбліжэйшым тэрмінале ў гэтым месяцы адстаюць ад графіка. Bloomberg таксама спасылаецца на звесткі партовага аператара Tribeca Shipping, згодна з якім праз уведзеныя Турцыяй у верасні 2018 года новых правілаў праходу суднаў праз пралівы, застапарылася дастаўка 39 млн бар. нафты.

Змены прадугледжваюць суправаджэнне большай колькасці суднаў буксірамі. Таксама на суднаходства ў пралівах паўплывала кепскае надвор'е. Паводле звестак Tribeca, танкеры чакаюць па 13 дзён, каб пакінуць акваторыю Чорнага мора, у адваротным кірунку час чакання складае 15 дзён. Гэта самы працяглы час чакання ў чарзе на праход праз пралівы з 2014 года.

Неўзабаве нафтаперапрацоўчыя заводы Міжземнамор'я пачнуць адчуваць наступствы перабояў з дастаўкай нафты, калі затрымкі працягнуцца або ўзмоцняцца, заявіў Bloomberg дырэктар кансалтынгавай кампаніі Facts Global Energy Джэймс Дэвіс.

Камандуючы ВМС Украіны Ігар Варончанка ў лістападзе 2018 года заявіў, што Кіеў закліча сусветную супольнасць закрыць для расейскіх вайсковых караблёў праход праз Басфор і Дарданелы. Прычынай такога закліку стала затрыманне Расеяй трох украінскіх вайсковых караблёў у раёне Керчанскай пратокі.