Роўна праз год ля акумулятарнага завода пад Берасцям зноў сабраліся людзі

Праціўнікі акумулятарнага завода пад Берасцем так наважылі адзначыць гадавіну сваёй барацьбы з ім.

Удзень 5 студзеня побач з акумулятарным заводам «АйПауэр» у СЭЗ «Берасце» сабралася некалькі дзясяткаў жыхароў абласнога цэнтра і раёна. Яны ўспаміналі пра падзеі, якія адбыліся за час барацьбы з прадпрыемствам, і абмяркоўвалі магчымыя далейшыя дзеянні, піша «Брестская газета».

Нагадаем, 5 студзеня 2018 года ля будпляцоўкі акумулятарнага завода ўпершыню сабраліся некалькі дзясяткаў жыхароў Берасця і раёна, каб атрымаць адказы на хвалюючыя іх пытанні, якія тычацца з'яўлення гэтай вытворчасці. Больш за ўсё людзей абурыла тое, што грамадскія абмеркавання справаздачы аб уздзеянні на навакольнае асяроддзе завода правялі фармальна.

Запэўніванні чыноўнікаў і прадстаўнікоў завода, што прадпрыемства «абсалютна бяспечнае» і «не прычыніць шкоды людзям і навакольнаму асяроддзю», не пераканалі мясцовых жыхароў, якія сабраліся каля будоўлі. Яны заявілі, што збор подпісаў супраць завода, ужо распачаты ў раёне, будзе весціся і ў абласным цэнтры.

За 2018 год у Берасці і раёне адбыліся дзясяткі падзей, звязаных з барацьбой з заводам.