У Кангрэс ЗША ўнеслі рэзалюцыю супраць скасавання санкцый з кампаній Дзерыпаскі

Рэзалюцыю маюць ухваліць у абедзвюх палатах Кангрэса да 18 студзеня.

Кангрэс ЗША пераглядае пастанову адміністрацыі прэзідэнта Дональда Трампа скасаваць санкцыі ў дачыненні да кампаній, якія належаць расейскаму алігарху, што мае шчыльныя сувязі з кіраўніком РФ Пуціным, Алегу Дзерыпаску. Пра гэта паведамляе выданне The New York Times (пераклад - «Зеркало недели»).

Зазначаецца, што лідар Дэмакратычнай партыі ў Сэнаце Чак Шумэр унёс рэзалюцыю, накіраваную супраць скасавання санкцый. Для таго, каб захаваць у дзеянні санкцыі супраць кампаній Дзерыпаскі, рэзалюцыю маюць ухваліць у абедзвюх палатах Кангрэса да 18 студзеня. У адваротным выпадку абмежавальныя захады будуць аўтаматычна знятыя з "Русала", EN+, а таксама "Евросибэнерго".

6 красавіка 2018 года ЗША ўвялі санкцыі супраць 36 фізічных асоб і кампаній з "крамлёўскага спісу". У пералік трапілі сем алігархаў, 17 высокапастаўленых чыноўнікаў, а таксама 12 дзяржаўных і прыватных кампаній.

У санкцыйныя спісе апынуліся бізнэсоўцы Алег Дзерыпаска, Ігар Ратэнбэрг, Кірыл Шамалаў, Віктар Вексельбэрг, Уладзімір Багданаў, Андрэй Скоч, сэнатар Сулейман Керымаў, а таксама міністр унутраных спраў Уладзімір Калакольцаў, кіраўнік Расгвардыі Віктар Золатаў, кіраўнік Раскамнагляду Аляксандр Жараў, кіраўнік ВТБ Андрэй Косцін, кіраўнік "Газпрама" Аляксей Мілер, сакратар Савета бяспекі РФ Мікалай Патрушаў ды іншыя.

У спісе кампаній пераважна структуры Алега Дзерыпаскі - акрамя "Русала" і En+, гэта група "ГАЗ", аграхолдынгі "Кубань", Basic Element Ltd, B-Finance Ltd, "ЕўраСібЭнэрга", "Рускія машыны". У "чорны спіс" таксама ўключаны група "Рэнова", NPV Engineering і "Газпрам бурэнне" Ігара Ратэнбэрга, "Ладага Мэнэджмэнт" Кірылы Шамалава, дзяржаўны Расабаронэкспарт і банк РФК (належыць "Расабаронэкспарт" з "чорнага спісу"). Іх актывы ў ЗША замарожаны, а амерыканскім кампаніям і грамадзянам забаронена ўкладаць з імі якія-небудзь угоды.

9 красавіка ў "Русал" паведамілі, што санкцыі ЗША паставілі кампанію перад пагрозай тэхнічнага дэфолту. Следам за гэтым кошт каштоўных папер UC Rusal на Ганконжскай біржы ўпаў больш як на 50%. З моманту абвяшчэння санкцый капіталізацыя гэтага актыву Дзерыпаскі ўпала больш чым на 3 млрд даляраў.

18 траўня Дзерыпаска пакінуў раду ўправы EN+. Раней ён пагадзіўся адмовіцца ад кантролю над канцэрнам "Русал", скараціць сваю дзель у холдынгу EN+ з 70% да менш як 50%, а таксама выйсці з рады ўправы.