На Аранскай руйнуюць частку будынка «Белмедпрэпаратаў»

Што будзе з будынкам далей?

На днях менчукі заўважылі, што на Аранскай руйнуюць частку будынка прадпрыемства «Белмедпрэпараты». Tut.by даведаўся, што будзе з будынкам далей.

«Белмедпрэпараты» размешчаны на скрыжаванні Маякоўскага і Аранскай. На днях менчукі заўважылі, што частку будынку руйнуюць. Гэта выклікала розныя пытанні і версіі.

Як высветлілася, гэта звязана з мадэрнізацыяй прадпрыемства. Так, згодна з пашпартам аб'екта, чакаецца рэканструкцыя лядоўні і кампрэсарнай. Гэтую частку зруйнуюць дашчэнту.

На месцы зруйнаванай лядоўні пабудуюць складскія памяшканні для вытворчасці лекавых сродкаў і фармацэўтычных субстанцый. Работы павінны скончыць у траўні 2019 года.

- У заказчыка (РУП «Белмедпрэпараты». - Заўвага) ідзе мадэрнізацыя памяшканняў. Асноўную частку работ яны плануюць завяршыць да правядзення II Еўрапейскіх гульняў. На фасаднай частцы будзе рабіцца афарбоўка - у рамках бягучага рамонту. А ў рамках рэканструкцыі частку будынкаў мадэрнізуюць. Руйнаваць увесь будынак не будуць, пра гэта нават гаворкі не ідзе, - сказаў намеснік кіраўніка адміністрацыі Ленінскага раёна Сяргей Павочка.

Аператыўны каментар ад кіраўніцтва «Белмедпрэпаратаў» атрымаць не ўдалося.