Балгарыя вылучыла ўмовы Паўночнай Македоніі для ўступлення ў ЕЗ
- 11.10.2019, 11:45
- 6,141
Парламент Балгарыі прыняў дакумент з больш чым 20 патрабаваннямі.
Парламент Балгарыі прагаласаваў за прыняцце ўрадавай дэкларацыі для падтрымкі пачатку перамоваў пра ўступленне ў ЕЗ з Албаніяй і Паўночнай Македоніяй, але пры ўмове выканання шэрагу патрабаванняў.
Пра гэта паведамляе «Еўрапейская праўда» са спасылкай на балканскае агенцтва IBNA.
У дакуменце пералічаныя больш за 20 патрабаванняў да дзвюх краінаў-кандыдатак і графік іх выканання, прычым абсалютная большасць тычыцца Паўночнай Македоніі.
У дэкларацыі паказана, што «Балгарыя не дазволіць інтэграцыю Рэспублікі Паўночная Македонія ў ЕЗ, што будзе суправаджацца еўрапейскай легітымізацыяй антыбалгарскай ідэалогіі».
«Перапісванне гісторыі балгарскага народа пасля 1944 года з'яўляецца адным з слупоў антыбалгарскага ідэалагічнага ладу былога югаслаўскага таталітарызму», – гаворыцца ў дакуменце.
Дэкларацыя патрабуе ад Паўночнай Македоніі не праводзіць палітыку, якая падтрымлівае патрабаванні «македонскай меншасці» ў Балгарыі.
Дакумент заклікае Паўночную Македонію пачаць працэс рэабілітацыі ахвяраў камуністычнага рэжыму ў Югаславіі, якія былі рэпрэсаваныя за тое, што ўважалі сябе балгарамі.
Балгарыя хоча, каб Паўночная Македонія выдаліла тэксты са знакаў, шыльдаў і збудаванняў, якія заахвочваюць нянавісць да Балгарыі, у тым ліку тыя, дзе выкарыстоўваюцца такія фразы, як, напрыклад, «балгарскія фашысцкія акупанты».
Іншыя патрабаванні датычацца супярэчлівых гістарычных падзей і фігураў эпохі Асманскай імперыі і да Другой сусветнай вайны, якія гісторыкі дзвюх краінаў часта трактуюць вельмі па-рознаму.
Сярод патрабаванняў таксама ўказана, што Рэспубліка Паўночная Македонія павінна дакладна заявіць, што кароткая версія яе назвы не мае нічога агульнага з геаграфічным рэгіёнам Паўночнай Македоніі, частка якога знаходзіцца на тэрыторыі Балгарыі.
Паводле інфармацыі Balkan Insight, адным з ключавых патрабаванняў з'яўляецца македонская мова. Балгарыя разглядае македонскую мову як балгарскі дыялект, настойваючы, што іх адрозненні з'яўляюцца вынікам свядомай антыбалгарскай палітыкі, якую праводзіла былая югаслаўская рэспубліка.
У дэкларацыі Балгарыя раіць ЕЗ пазбягаць выкарыстання тэрміна «македонская мова» падчас перамоваў пра ўступленне, а наўзамен выкарыстоўваць тэрмін «афіцыйная мова Рэспублікі Паўночная Македонія». Калі гэта немагчыма, то ЕЗ павінен паставіць зорачку пасля тэрміна «македонская мова», каб удакладніць, што гэта тэрмін, які выкарыстоўваецца ў Канстытуцыі Паўночнай Македоніі.
«Ні адзін дакумент у працэсе далучэння не можа разглядацца як балгарскае пацверджанне існавання так званай македонскай мовы, адрознай ад балгарскай», – рэзюмуецца ў тэксце.
Паводле Албаніі, дэкларацыя патрабуе, каб гэтая краіна гарантавала правы балгарскай нацыянальнай меншасці «напоўніцу», уключаючы навучанне балгарскай мове як роднай мове, без адміністрацыйных перашкодаў, у месцах, дзе традыцыйна жыве балгарская меншасць, а таксама ў іншых месцах.
Дакумент быў прыняты ў парламенце 129 галасамі, яго падтрымалі чатыры з пяці дэпутацкіх групаў, у тым ліку партыя ГЕРБ прэм'ер-міністра Бойка Барысава.