Украінскі сацыёлаг: Прэс-марафон Зяленскага падыме ягоны рэйтынг

Цяпер сітуацыя ўнікальная для Украіны.

Камандзе прэзідэнта Украіны неабходна ў гэты момант наладзіць дзейсную камунікацыю з грамадствам і больш актыўна прыцягваць экспэртнае асяроддзе перад прыняццем тых ці іншых важных для дзяржавы пастаноў.

Пра гэта заявіла дырэктарка Фонду «Дэмакратычныя ініцыятывы» ім. Ілька Кучэрыва Ірына Бекешкіна падчас круглага стала «Украіна пасля выбараў: што далей?», Паведамляе «Укрифнорм».

Паводле яе слоў, калі раней ва Украіне прэзідэнт пазіцыянаваўся як прадстаўнік ад Усходу ці Захаду, то цяпер ён пазіцыянуецца, як прэзідэнт «ад народа».

«Думаю, што ўчорашні марафон, што б там ні казалі крытыкі, толькі павысіць рэйтынг, таму што «гэта – наш», вось гэта чалавек ад народа... Цяпер сітуацыя ўнікальная для краіны: ніколі яшчэ ніводзін прэзідэнт нават пасля выбараў не меў 70 % даверу. Ніколі яшчэ людзі не былі настроеныя так аптымістычна», - адзначыла Бекешкіна.

Яна нагадала, што раней у апытаннях аб настроях украінцаў заўсёды першыя радкі займалі «надзея» і «трывога». Аднак цяпер колькасць тых, хто адчувае трывогу, зменшылася ўдвая, і ўдвая вырас паказчык тых, хто з аптымізмам глядзіць у будучыню. У грамадстве назіраецца эйфарыя ад таго, што выбралі не палітыкаў, а людзей з народа, якія ўсё зробяць для людзей, падкрэсліла сацыёлаг.

Бекешкіна дадала, што паводле апытанняў, на сёння значна больш людзей вераць у поспех рэформаў, а таксама гатовыя цярпець нязручнасці дзеля зменаў да лепшага.

Сярод першых выпрабавальных крокаў для каманды прэзідэнта, адзначыла яна, будзе развязанне пытання Данбаса і ўмоў, на якіх будзе ўстаноўлены мір, а таксама развязанне пытання зямлі. Яшчэ адным выклікам для каманды прэзідэнта з'яўляецца праблема занадта хуткага прыняцця заканадаўчых пастаноў, якое ў народзе назвалі «ашалелай друкаркай».