Трамп вылучыў новага амбасадара ЗША ў Расеі

Што пра яго вядома?

Прэзідэнт ЗША Дональд Трамп афіцыйна пацвердзіў тое, што ў сусветных СМІ абмяркоўваюць ужо даўно: на пасаду новага амбасадара ЗША ў Расеі прапанаваная кандыдатура Джона Салівана, які дагэтуль займаў пасаду першага намесніка дзяржсакратара Майка Пампея. Цяпер гэта прызначэнне павінны зацвердзіць сенат, паведамляе расейская служба ВВС.

Папярэднім паслом ЗША ў Расеі быў Джон Хантсман, які займаў гэту пасаду з кастрычніка 2017 года. У жніўні гэтага года ён падаў прэзідэнту Трампу заяву аб адстаўцы з 3 кастрычніка, бо, паводле пагалосак, наважыў узяць удзел у наступных губернатарскіх выбарах ад свайго роднага штата Юта.

У сваім прашэнні аб адстаўцы Хантсман даў параду свайму пераемніку: "Мы павінны і надалей працягваць прыцягваць Расею да адказнасці, калі яе паводзіны нясуць пагрозу для нас і нашых хаўруснікаў".

Хто такі Джон Саліван?

У адрозненне ад свайго верагоднага пераемніка, у Джона Хантсмана (злева) багаты дыпламатычны досвед: ён пачынаў у адміністрацыі Рональда Рэйгана, быў паслом у Сінгапуры і Кітаі

Джону Салівану 60 гадоў, ён нарадзіўся ў Бостане, штат Масачусэтс.

З траўня 2017 года займае пасаду намесніка дзяржсакратара ЗША. Сенат ухваліў яго кандыдатуру пераважнай большасцю галасоў (94-6), што было рэдкасцю ў пытаннях амерыканскай кадравай палітыкі.

Па адукацыі Саліван юрыст, ступень доктара права ён атрымаў у Калумбійскім універсітэце.

На дзяржслужбу прыйшоў у 1991 годзе ў міністэрства юстыцыі, дзе пачынаў дарадцам памочніка генеральнага пракурора.

У 1992-м быў намеснікам галоўнага юрысконсульта выбарчай кампаніі прэзідэнта Джорджа Буша-малодшага.

Пазней займаў высокую пазіцыю ў юрыдычнай службе міністэрства абароны ЗША.

Пры Бараку Абаме узначальваў міжурадавую групу "ЗША-Ірак: дыялог у сферы бізнэсу".

Пры багатым досведзе дзяржслужбы Джон Саліван не з'яўляецца кар'ерным дыпламатам, і яго прызначэнне ў Маскву выклікае нямала пытанняў.

З аднаго боку, Саліван знаёмы з расейскім істэблішмэнтам, бо зусім нядаўна ўзначальваў перамовы з расейскім бокам у пытаннях барацьбы з тэрарызмам і кантролю над узбраеннямі.

Пры гэтым, як піша Wall Street Journal, ён выконваў важную ролю ў пытанні ўзмацнення жорсткасці антырасейскіх санкцый.

І калі ў вялікім міжнародным парадку ён разбіраецца, дык на пасадзе пасла яму давядзецца вырашаць мноства задач, дзе папярэдні практычны досвед быў бы вельмі дарэчы.

Напрыклад, сярод першачарговых спраў яму давядзецца разбірацца з рашэннем расейскага МЗС адмовіць у візах 30 настаўнікам, якіх чакалі ў Маскве ў Англа-амерыканскай школе.

Школа працуе на базе пасольстваў ЗША, Вялікабрытаніі і Канады. Папаўненне настаўнікаў чакалі ў жніўні, да пачатку навучальнага года, але ў ліпені ім было адмоўлена ў расейскіх візах.

Са слоў усё яшчэ выканаўцы абавязку амбасадара Джона Хантсмана, сітуацыя вельмі сур'ёзная, бо праз недахоп выкладчыцкага складу давядзецца адлічыць значную колькасць вучняў-дзяцей замежных дыпламатаў.