На мяжы Індыі і Пакістана адбыліся баявыя сутыкненні

З абодвух бакоў ёсць загінулыя.

На лініі кантролю паміж індыйскай і пакістанскай часткамі спрэчнага рэгіёну Кашмір зноў адбыліся сутыкненні. У выніку дзеянняў памежнікаў Пакістана загінулі двое індыйскіх салдат і мірны жыхар, паведамляе індыйская паліцыя ў нядзелю, 20 кастрычніка. Ісламабад заявіў пра шэсць загінулых грамадзянскіх асоб. Акрамя таго, з абодвух бакоў маюцца пацярпелыя, адзначае Reuters (пераклад - dw.com).

5 жніўня Нью-Дэлі скасаваў асаблівы статус спрэчнага рэгіёну, прапісаны ў канстытуцыі Індыі. У канцы ліпеня цэнтральныя ўлады накіравалі дадатковы кантынгент з 10 тысяч вайскоўцаў у штат Джаму і Кашмір, дзе захоўваецца нестабільная палітычная абстаноўка. Улады Пакістана 7 жніўня панізілі ўзровень дыпламатычных адносін з Індыяй.

Прычына канфлікту ў Кашміры

Тэрыторыя Кашміра застаецца прадметам спрэчкі паміж Індыяй і Пакістанам з 1947 года, калі Лондан, падаўшы незалежнасць Брытанскай Індыі, падзяліў яе на дзве дзяржавы па рэлігійнай прыкмеце. Абедзве краіны ажыццяўляюць адміністрацыйнае кіраванне асобнымі раёнамі Кашміра.

Паколькі ў індыйскай вобласці Кашміра існуюць таксама моцныя сепаратысцкія настроі, Індыя традыцыйна размяшчае ў рэгіёне вялікую колькасць ваенізаваных і паліцэйскіх фармаванняў. Нью-Дэлі пастаянна абвінавачвае Ісламабад у падтрымцы сепаратыстаў, Пакістан зняпраўджвае гэтыя абвінавачванні.