14 лiстапада 2019, Чацвер, 15:37
Добрая навіна
Рубрыкі

Беларусы прапанавалі аддаць грошы, якія ідуць на БТ, блогеру NEXTA

19
Беларусы прапанавалі аддаць грошы, якія ідуць на БТ, блогеру NEXTA

Уладам давялося адказваць на петыцыю.

На пачатку кастрычніка ў Міністэрства інфармацыі краіны і ўрад была адпраўленая петыцыя, у якой выказвалася меркаванне, што «дзяржаўныя СМІ не даюць рады ускладзенай на іх задачы што да своечасовага і аб'ектыўнага інфармавання нас аб апошніх навінах і падзеях у Беларусі, нягледзячы на вельмі значнае, паводле наяўных у нас звестак, фінансаванне з дзяржаўнага бюджэту», піша «Брестская газета».

Разам з тым стваральнік Telegram-канала Nexta Сцяпан Пуціла прыносіць, на іхні погляд, «у разы больш карысці ў вышэйапісаным пытаннях для беларускага грамадства, значна хутчэй падаючы інфармацыю пра найбольш цікавыя і важныя для нас падзеі, здарэнні, пры гэтым з поўнай адсутнасцю цэнзуры, у зразумелай і цікавай для нас форме».

«У сувязі з гэтым просім частку бюджэту, прызначанага сёлета для Белтэлерадыёкампаніі, з прычыны дрэнных, на нашу думку, вынікаў яе дзейнасці, накіраваць на падтрымку Telegram-канал Nexta, а з 2020 года даваць гэтаму Telegram-каналу сталую фінансавую падтрымку з боку дзяржавы, і зменшыць фінансаванне БТРК да 10 000 рублёў на год», - гаварылася ў звароце.

Міністэрства інфармацыі адказала, што ў пытаннях своечасовасці і аб'ектыўнасці трэба звяртацца наўпрост да самога СМІ - паводле закону міністэрства не мае права ўмешвацца ў прафесійную дзейнасць СМІ, калі яно не парушае закон.

Фінансаванне прыватнага інтэрнэт-рэсурсу з невядомым юрыдычным статусам і месцазнаходжаннем з'яўляецца праблемай уладальніка гэтага рэсурсу.

Што да пераразмеркавання дзяржаўных сродкаў, выдадзеных на фінансаванне дзейнасці Белтэлерадыёкампаніі, гэта не належыць да кампетэнцыі Мінінфарма - Белтэлерадыёкампанія «падпарадкоўваецца і падсправаздачная прэзідэнту Беларусі».