18 лiстапада 2019, панядзелак, 15:37
Дзень другі
Рубрыкі

Пратэст праз восем капеек

3
Пратэст праз восем капеек
ФОТА: REUTERS

Беларусы таксама ў нейкі момант зразумеюць чылійцаў.

Масавыя беспарадкі, перакуленыя аўтамабілі, загінулыя і параненыя ... У Чылі трэці тыдзень пратэстуюць праз павышэнне кошту праезду ў метро на 30 песа (прыкладна на 4 цэнты), піша «Салiдарнасць».

Каб вы разумелі, Чылі - адна з самых багатых краін Паўднёвай Амерыкі. Сярэднямесячны заробак там у 2019 годзе склаў блізу 1074 даляраў. Афіцыйная мінімальная аплата працы - блізу 417 даляраў.

Параўноўваць гэтыя паказчыкі з беларускімі нават неяк сорамна. У краіне, дзе сярэдні заробак не дацягвае і да 500 даляраў, а мінімалка наогул выглядае як здзек, з'яўляючыся адной з самых нізкіх нават у былым СССР, аб такіх маштабах пратэсту нават не чулі.

Цікавае назіранне. Калі пачытаць каментары пад гэтай навіной на беларускіх форумах, то можна заўважыць, што практычна ўсе ў адзін голас выказалі абурэнне дзеяннямі пратэстоўцаў. Маўляў, яны і лайдакі, і радыкалы, і наогул разбэсціліся.

Яно і зразумела, падаражэнне на 8 капеек пры заробку тысяча даляраў паводле беларускіх мерак не цягне нават на нагоду для абмеркавання на кухні. Вось у нас у 2011 годзе кошты на 100% рванулі пасля «бліскуча» праведзеных выбараў - і што? Так, беларусы тады таксама трошкі «пашумелі». Калі, вядома, так можна назваць «маўклівыя акцыі» 2011 года.

У гэтым сэнсе беларусам ніколі не зразумець чылійцаў. Хоць, з іншага боку, гэта толькі з першага погляду здаецца, што людзі ў Чылі выйшлі на плошчу праз «8 капеек». Пратэст супраць падаражэння праезду быў толькі нагодай. Апошняй кропляй у шэрагу вялікіх праблем, звязаных з дзеяннямі чылійскіх уладаў.

Да гэтага былі і рост коштаў камуналкі, і падаражанне бензіну, лекаў і іншых жыццёва важных рэчаў, і пенсійная рэформа.

Многія гады чылійцы, як і беларусы, трывалі, бадзёрыя словы ўладаў, што вось-вось крызіс абміне і прыйдзе шчасце. Трывалі, пакуль у нейкі момант не здарыліся гэтыя няшчасныя «8 капеек». І пачалося!

І ў гэтым сэнсе, магчыма, беларусы таксама ў нейкі момант зразумеюць чылійцаў.