Беларусь ды Расея рыхтуюць свой аналаг SWIFT

Паміж дзвюма краінамі ствараецца сістэма фінансавых разлікаў.

Беларусь ды Расея заканчваюць стварэнне двухбаковай сістэмы фінансавых разлікаў, якая не прадугледжвае выкарыстанне міжнароднай аплатнай сістэмы SWIFT, паведаміў журналістам у аўторак у Менску на палях форуму Банка старшыня праўлення ААТ «Беларускі міжбанкавы разліковы цэнтр» (БМРЦ) Алег Караб’ін, піша «Інтэрфакс».

«Праект знаходзіцца ў высокай ступені гатоўнасці, ужо ўкладзеная дамова з Банкам Расеі, які мае на ўвазе, што БМРЦ стане калектыўным вузлом для банкаўскай сістэмы Беларусі. Фактычна мы будзем выконваць такую ж ролю, як цяпер выконваем згодна з сістэмай SWIFT», - сказаў Караб’ін.

«Гэта фактычна альтэрнатыўны сэрвіс для правядзення аплатаў беларускімі банкамі на карысць расейскіх контрагентаў. І з Расеі на карысць беларускіх банкаў без SWIFT», - адзначыў ён.

«Гэта была палітычная пастанова двух цэнтральных банкаў для таго, каб аб'яднаць сістэмы разлікаў», - растлумачыў Караб’ін.

Ён паведаміў, што «двухбаковая сістэма перадачы фінансавых паведамленняў знаходзіцца ў высокай ступені гатоўнасці, да канца года мы плануем яе запусціць, рэальна - лістапад-снежань». «Усе дазволы ўжо атрыманыя, цяпер ідзе працэс аб'яднання ўсіх модуляў сістэмы ў адзінае цэлае», - дадаў Караб’ін.

Мэтай стварэння сістэмы было спрашчэнне і патанненне разлікаў паміж прадпрыемствамі Беларусі ды Расеі. Асноўнай валютай разлікаў стане расейскі рубель.

Удзел беларускіх прадпрыемстваў і банкаў у сістэме разлікаў, якая ствараецца, будзе «вядома, на іх меркаванне», адзначыў кіраўнік БМРЦ. «Заканадаўчых актаў у гэтай частцы (абавязкі выкарыстоўваць сістэму - заўв.) не прынята», - дадаў ён.