Туск рэкамендуе лідарам ЕЗ даць Лондану адтэрміноўку ў Brexit
1- 23.10.2019, 10:33
- 7,136
Гэта неабходна, каб пазбегнуць нерэгуляванага выхаду Вялікай Брытаніі з ЕЗ.
Кіраўнік Еўрапейскай рады Дональд Туск заявіў, што будзе рэкамендаваць лідарам краінаў Еўразвязу пагадзіцца на прапанаваны Лонданам перанос даты "Брэкзіту". Пра гэта ён напісаў у аўторак, 22 кастрычніка, у сваім Twitter, патлумачыўшы, што перанос даты неабходны, каб пазбегнуць нерэгуляванага выхаду Вялікай Брытаніі з ЕЗ, паведамляе dw.com.
Між тым прэм'ер-міністр Вялікай Брытаніі Борыс Джонсан заявіў, што ўрад паскарае падрыхтоўку да выхаду з ЕЗ без угоды з Брусэлем і часова прыпыняе разгляд законапраекта аб "Брэкзіце" парламентам краіны. Гэта адбылося пасля таго, як ніжняя палата брытанскага парламента адхіліла прапанову Джонсана за тры дні ратыфікаваць пагадненне пра выхад Вялікай Брытаніі з ЕЗ, якое ён заключыў з Брусэлем. Такім чынам у брытанскага прэм'ера ўсё менш шанцаў ажыццявіць "Брэкзіт" да 31 кастрычніка – гэтую дату ён неаднаразова называў у якасці апошняга тэрміну.
Following PM @BorisJohnson’s decision to pause the process of ratification of the Withdrawal Agreement, and in order to avoid a no-deal #Brexit, I will recommend the EU27 accept the UK request for an extension. For this I will propose a written procedure.
— Donald Tusk (@eucopresident) 22 октября 2019 г.
Фармальна ўрад Вялікай Брытаніі 19 кастрычніка папрасіў Брусэль падоўжыць дзеянне артыкула 50 Лісабонскай дамовы, што вызначае рэгламент і тэрміны выхаду Злучанага Каралеўства з ЕЗ. Аднак у спадарожным лісце Джонсан падкрэсліў, што "не будзе весці перамовы пра адтэрміноўку з Еўрапейскім звязам".
Марнаванне часу і энэргіі
Жан-Клод Юнкер, які сыходзіць з пасады старшыні Еўрапейскай камісіі, у аўторак раскрытыкаваў працэс "Брэкзіту". Выкліканыя гэтай пастановай Лондана больш чым трохгадовыя перамовы з Брусэлем "былі марнаваннем часу і энэргіі", заявіў ён. Кіраўнік Еўракамісіі адзначыў, што заўсёды будзе шкадаваць пра пастанову Лондана. "Мы можам паглядзець у люстэрка і быць упэўненымі, што зрабілі ўсё, каб гэта быў урэгуляваны выхад", – адзначыў ён.
