«Шахцёр» і БАТЭ згулялі ўнічыю: «Дынама» Берасце без пяці хвілін чэмпіён

БАТЭ вельмі блізкі да таго, каб упершыню за 12 гадоў страціць чэмпіёнства.

Часу дагнаць «Дынама» Берасце ўсё менш. Каманда Марцэла Лічкі нават у вельмі складаных матчах не дазваляе сабе асечак і выгрызае перамогі, піша tribuna.com.

Сёння барысаўчанам, каб сапраўды застацца ў гульні, трэба было пераадолець «Шахцёр», які таксама яшчэ не страціў шанцы на тытул. У Салігорску каманды змагаліся шляхетна.

Пачатак паядынку быў сумным. Адчувалася, як футбалісты баяцца спатыкнуцца. Разняволіліся каманды бліжэй да канца першага тайма, калі забіў БАТЭ. Пасля няўдалага вуглавога мяч зноў падабраў Ігар Стасевіч і закруціў у штрафную. Мяч, нікога не крануўшы, трапіў у сетку.

Пасля перапынку разгарнуўся сапраўдны трылер. На 51-й хвіліне Мікалай Януш працягнуў мяч у штрафную і прастрэліў у брамавую - Дарка Бодул замкнуў.

Праз дзесяць хвілін БАТЭ зноў выйшаў наперад. Дзмітрый Бяссмертны падхапіў нічыйны мяч на правым флангу і навесіў у штрафную. Няманя Міліч скарыстаўся блытанінай у абароне «гарнякоў» і адправіў мяч у кут брамы.

Але «Шахцёр» так проста не здаўся. Зноў салігарчанаў выручыў супер-Януш. Пасля падачы з кутняга выскачыў вышэй за ўсіх і забіў.

Даслоўна адразу Мікалай мог выводзіць «Шахту» наперад: уварваўся ў штрафную, перакінуў брамніка, але не трапіў у браму.

2:2 - рахунак, які задавальняе толькі Берасце. У «Шахцёра» стала 55 балаў (і «гульня» з менскай «Тарпедай» у запасе), у БАТЭ - 58 (і матч з «Дняпром» у запасе), у Берасці - 67 балаў. Каб узяць тытул берасцейцам трэба ўзяць усяго сем балаў у чатырох матчах. У выпадку роўнасці балаў пасля апошняга тура, будзе сыграны «залаты матч». У заключных турах «Дынама» згуляе дома з «Шахцёрам», на выездзе супраць «Іслачы», дома з «Віцебскам» і ў гасцях у менскага «Дынама».