У Сонечнай сістэме знайшлі новую карлікавую планету

На гэты момант у Сонечнай сістэме афіцыйна прызнаныя пяць карлікавых планет.

Касмічнае цела Гігея з галоўнага пояса астэроідаў мае ўсе параметры, каб лічыцца шостай карлікавай планетай Сонечнай сістэмы. Высновы навукоўцаў апублікаваныя ў навуковым часопісе Nature Astronomy, паведамляе lenta.ru.

Новыя выявы цела былі атрыманыя з дапамогай прымача SPHERE на «Вельмі Вялікім тэлескопе» (VLT - Very Large Telescope) у Чылі. Так, навукоўцы ўсталявалі, што Гігея адпавядае ўсім чатыром патрабаванням, каб лічыцца карлікавай планетай: яна круціцца вакол Сонца, не з'яўляецца спадарожнікам, не можа расчысціць раён уласнай арбіты (у адрозненне ад планет) і мець масу, дастатковую, каб пад уздзеяннем уласнай гравітацыі прыняць сферычную форму. Паводле апошняга патрабавання ў навукоўцаў заставаліся сумневы.

У выніку назірання навукоўцы ўсталявалі форму Гігеі і яе памеры: дыяметр складае прыкладна 430 кіламетраў. Такім чынам гэта самая маленькая карлікавая планета Сонечнай сістэмы. Дагэтуль гэты статус быў за Цэрэрай, дыяметр якой складае 950 кіламетраў.

На гэты момант у Сонечнай сістэме афіцыйна прызнаныя пяць карлікавых планет: Эрыс, Макемаке, Хаўмея, Цэрэра і Плутон. Гігея лічыцца чацвёртым паводле памераў аб'ектам галоўнага пояса астэроідаў (пасля Цэрэры і астэроідаў Весты і Палады) і была адкрыта ў 1849 г. італьянскім астраномам Анібале дэ Гаспарысам у абсерваторыі Кападымонтэ.