Спецыяліст ІТ-сферы аб «лібералізацыі» эканомікі: Д'ябал таіцца ў дэталях
2- 8.10.2019, 14:56
- 12,396
Што не так з «IT-дэкрэтам» у Беларусі?
Бізнэсовец пракаментаваў заяву першага віцэ-прэм'ера Аляксандра Турчына аб тым, што ўрад робіць сур'ёзныя крокі ў лібералізацыі бізнэсу, піша «Салiдарнасць».
- Калі глядзець на вонкавую абалонку, можна сказаць, што сітуацыя ў нас нібыта нядрэнная. Стварыць кампанію можна хутка, асаблівых выдаткаў не патрабуецца, - адзначыў Валерый Сямілетаў у праграме «Примус». - Сапраўды ў сферы паслуг у Беларусі ты можаш пачаць весці бізнэс за тыдзень, калі не патрэбнае ліцэнзаванне. Прынялі дэкрэт №7, самазанятасць - калі ласка, працуйце, спадары! Але д'ябал, як заўсёды, таіцца ў дэталях. Калі ты пачынаеш працаваць, у цябе ўзнікаюць пытанні. Следам у нас прымаюць закон аб тым, што будуць правяраць усе прадпрыемствы, дзе сярэдні заробак ніжэйшы за 400 рублёў. А як гэта карэлюе з лібералізацыяй?
Я разумею, што асноўная маса краіны жыве паводле іншых законаў. І гэта праблема. Таму што мы, напрыклад, можам выкарыстоўваць элементы ангельскага права ў сваёй дзейнасці пры ўкладанні дамоў, іншыя гэтай магчымасці пазбаўленыя. І такіх момантаў вельмі шмат: гэта і сацыяльныя адлічэнні, і бухгалтарская справаздачнасць.