Жыхар Маладзечна пацікавіўся ў чыноўніка, куды ідзе дарожны падатак

Улады паўтараюць, што сродкаў на рамонт няма.

Жыхар Маладзечна звярнуўся на прамую лінію Мінаблвыканкама з просьбай адрамантаваць дарогу Н-9112 Маладзечна - Забалоцце - Іванаўшчына - УСБ «Вілія», піша сайт mlyn.by.

Анатоль Іванавіч распавёў намесніку старшыні Мінаблвыканкама Івану Маркевічу, што праводзіў жывую лінію аб тым, што гэты ўчастак трасы даўно мае патрэбу ў рамонце:

- Дарога ўся ў ямах. Калі ў дажджлівае надвор'е па ёй праедзе сельскагаспадарчая тэхніка, іншыя машыны рухацца не змогуць. Пры гэтым уздоўж дарогі знаходзіцца пяць дачных кааператываў. Я звяртаўся ў ДРБУ №195, дзе мне сказалі, што сродкаў на рамонт няма.

Аднак два гады запар у раённай газеце пішуць, што будзе праведзенае «паляпшэнне» дарожнага пакрыцця з даданнем жвірова-пясчанай сумесі.

Са слоў Анатоля Іванавіча, некаторы час таму ішла гаворка пра тое, што дарогу заасфальтуюць.

- Мы выдатна разумеем, што на гэта патрэбныя сродкі. Але хай хоць бы зробяць падсыпку.

Нагадаем, што падатак за выдачу дазволу на допуск транспартнага сродку да ўдзелу ў дарожным руху быў уведзены ў Беларусі ў 2015-м годзе. Гэта рашэнне ўладаў стала адным з самых спрэчных за апошнія гады.

Адным з галоўных наступстваў увядзення дарожнага падатку стала масавая адмова аўтаўладальнікаў праходзіць тэхнічны агляд, які ўвязалі з выплатай падаткаў.

У красавіку сёлета ўлады планавалі адвязаць дарожны збор ад праходжання тэхагляду аўтамабіля і скасаваць. А замест увесці дзяржаўны падатак за карыстанне дарогамі, які можна будзе аплачваць памесячна - толькі за перыяд, калі аўтамабіліст карыстаецца аўтамабілем. Аднак, доўгачаканага скасавання падатку не адбылося.