Чэхія дэпартавала чатырох чалавек з дамоў дыпламатаў РФ
5- 16.12.2019, 18:22
- 13,546
Яны жылі ў дамах без пасведчання на права жыхарства.
З Чэхіі дэпартавалі чатырох замежнікаў, якія без пасведчання на права жыхарства жылі ў дамах, якія знаходзяцца ў распараджэнні расейскай амбасады.
Пра гэта паведамляе «Европейская правда» са спасылкай на Deník N.
Як заявіла прэс-сакратарка паліцыі Эва Крапачава, гэтым асобам забаронены ўезд у Чэхію на тэрмін ад аднаго да чатырох гадоў. «Выкананне чэшскіх законаў павінна распаўсюджвацца на ўсіх», - сказаў міністр замежных спраў Томаш Петршычак.
Паводле звестак выдання, адказны супрацоўнік расейскай амбасады Міхаіл Саруханаў можа быць аштрафаваны за тое, што даў прытулак гэтым людзям і не аформіў іх рэгістрацыю.
У пачатку сакавіка чэшскае медыя паведаміла, што расейскае пасольства ў Празе атрымлівае прыбытак ад здачы ў арэнду амаль двух сотняў кватэр у чатырох дамах у раёне Прагa 6, прызначаных для расейскіх дыпламатаў.
Кватэры ў чатырох дамах належаць чэшскай дзяржаве і выдадзеныя расейскай амбасадзе для яе дыпламатаў на нявызначаны перыяд яшчэ да падзення камунізму ў 1989 годзе, пацвердзілі ў МЗС Чэхіі.
Паведамлялася, што жыхары кватэр у асноўным з'яўляюцца расейскімі грамадзянамі і арандуюць тамтэйшае жыллё дзясяткі гадоў. Амбасада РФ насуперак міжурадавым дамовам таксама здавала кватэры турыстам.
Пры гэтым арандатары не маюць адпаведных дамоў і ўносяць плату наяўнымі, што з'яўляецца парушэннем закона. Яны не могуць давесці, як доўга яны жывуць па гэтым адрасе і колькі плацяць за арэнду.
МЗС Чэхіі выказала ў сувязі з гэтым пратэст і запатрабавала ад расейскай амбасады як мага хутчэй адклікаць свайго супрацоўніка Аляксандра Цярэнцьева, які браў плату ад наймальнікаў жылля і абвінавачваецца ва ўжыванні да іх фізічнага гвалту. Улетку Цярэнцьеў пакінуў Чэхію.