Навагодні «падарунак»: з 1 студзеня грошы з рахункаў беларусаў будуць спісваць аўтаматычна

Гаворка ідзе пра тыя сумы, якія прымуць за «завінавачанасць перад дзяржавай».

З 1 студзеня 2020 года ўваходзіць у дзеянне аўтаматызаваная інфармацыйная сістэма выканання грашовых абавязанняў (АІС ВГА), так было запісана ва ўказе №414 «Аб удасканаленні безгатоўкавых разлікаў», падпісаным яшчэ ў 2018-м. У пастанове шмат справядлівых абгрунтаванняў, але для завінавачаных жыццё стане складанейшым, піша onliner.by.

Укараненне згаданага механізму спагнання накіраванае на выключэнне выпадкаў шматразовага спісання органамі спагнання адной і той жа сумы грашовых сродкаў з усіх рахункаў завінавачаных, аўтаматызацыю і ўніфікацыю працэсаў спагнання грашовых сродкаў для ўсіх органаў спагнання, скарачэнне дакументальнага абарачэння паміж органамі спагнання і банкамі.

Пад платнікамі разумеюцца юрыдычныя асобы, у тым ліку філіі, што ажыццяўляюць выкананне іх грашовых абавязанняў, прадстаўнiцтвы ды іншыя адасобленыя філіi юрыдычных асоб, арганізацыі, якія не з'яўляюцца юрыдычнымі асобамі, а таксама фізічныя асобы, у тым ліку індывідуальныя прадпрымальнікі.

Адначасова з 1 студзеня самі банкі спыняюць весці картатэкі не аплачаных у тэрмін разліковых дакументаў. Усю інфармацыю яны павінны перадаць у Нацыянальны банк, які з'яўляецца ўладальнікам сістэмы АІС ВГА. Цяпер у ёй будзе фармавацца база нявыкананых грашовых абавязанняў платніка за кошт інфармацыі, якая змяшчаецца ў накіраваных у яе аплатных патрабаваннях спаганяльнікаў і аплатных інструкцыях платнікаў на пералічэнне выплат у бюджэт.

На падставе гэтай інфармацыі сістэма аўтаматычна будзе вызначаць агульную суму нявыкананых грашовых абавязанняў платніка, чарговасць выканання разліковых дакументаў, фармаваць і накіроўваць у кожны банк платніка электронны дакумент, які змяшчае інфармацыю аб нявыкананых грашовых абавязаннях.

Нягледзячы за заяўленую ва ўказе дату, усё фактычна пачне працаваць з 3 студзеня. Напрыклад, Вы вінныя грошы ў бюджэт паводле «ліста шчасця» або неаплачаны падатак. АІС ВГА адпраўляе інфармацыю пра завінавачанасць у банкі, дзе завінавачаны мае рахункі. Калі Вы вінныя 50 рублёў, то яны замарожваюцца на кожным з рахункаў завінавачанага.

Аплатныя інструкцыі будуць выстаўляцца да рахункаў у наступным парадку, згодна з Пастановай урада і НБ РБ ад 28 чэрвеня 2019 года №432/11:

у першую чаргу - да бягучых рахункаў у валюце аплатнай інструкцыі;

у другую чаргу - да бягучых рахункаў у валюце, адрознай ад валюты аплатнай інструкцыі (з купляй/продажам);

у трэцюю чаргу - да іншых рахунках у банках, з якіх бясспрэчнае спагнанне прадугледжанае заканадаўчымі актамі (за выняткам спецыяльных рахункаў, адкрытых у адпаведнасці з заканадаўчымі актамі).

Гэта значыць, Ваш штраф 50 рублёў спачатку спішуць з бягучага рахунку, на які Вы атрымліваеце, напрыклад, заробак. Калі такога рахунку няма - звернуць увагу на валютны рахунак: прададуць валюту паводле курсу і спішуць. Калі і такога рахунку Вы не маеце, магчыма, у банку ляжыць дэпазіт - забяруць адтуль.

Такое спісанне называецца бясспрэчным. Фактычна гэтую працу доўга рабілі судовыя выканаўцы. АІС ВГА будзе дзейнічаць у рэжыме рэальнага часу. З гэтым звязаныя і чаканыя цяжкасці ў першыя дні: са слоў прадстаўніка аднаго з камерцыйных банкаў, ніхто не ведае, якая лавіна дэбітораў шуне адразу на пачатку года, у якой чарговасці іх будуць разглядаць і наколькі гэты працэс зацягнецца, пакуль не выйдзе на тэмп онлайн.

Таксама адкрытым застаецца пытанне: калі вінаваты мае рахункі ў некалькіх банках, то з якіх з іх будуць спісваць запазычанасць?

Але банкі - гэта самы папулярны рэсурс пошуку грошай. Ва ўказе таксама сказана пра тое, што завінавачанасць будзе спаганяцца праз нябанкавыя крэдытна-фінансавыя арганізацыі, ААТ «Банк развіцця Рэспублікі Беларусь», электронныя грошы ў электронных кашальках.

Хто будзе падаваць інфармацыю аб запазычанасці?

Органы Камітэта дзяржаўнага кантролю, падатковыя, мытныя органы, Міністэрства фінансаў, Фонд сацыяльнай абароны насельніцтва, органы, якія вядуць крымінальны працэс, іншыя дзяржаўныя органы і банкі пры рэалізацыі паўнамоцтваў, нададзеных ім заканадаўчымі актамі на спагнанне ў бясспрэчным парадку грашовых сродкаў (электронных грошай).