Знойдзеная асобіна найбуйнейшай у свеце пчалы, якая лічылася вымерлай

Апошнім разам «гіганцкую пчалу Уолеса» бачылі ў 1981 годзе.

Фатограф-натураліст Клэй Болт сфатаграфаваў пчалу чырвонакніжнага віду Megachile pluto, якую амаль 40 гадоў лічылі вымерлай. Гэта найбуйнейшая пчала ў свеце - памерам з вялікі палец дарослага чалавека і са сківіцамі як у жука-аленя, паведамляе ВВС.

Пчалу ўпершыню апісаў брытанскі энтамолаг Альфрэд Уолес у 1858 годзе, але неўзабаве яе колькасць скарацілася настолькі, што від сталі лічыць вымерлым. Апошнім разам «гіганцкую пчалу Уолеса» бачылі ў 1981 годзе на інданезійскім востраве Бачан. Даследчыкі знайшлі шэсць гнёздаў.

Цяпер даследчык з Фонду дзікай прыроды Клэй Болт знайшоў самку гэтага віду на тым жа самым востраве, паўтарыўшы маршрут энтамолага пазамінулага стагоддзя на аснове яго запісаў.

Уолес апісваў Megachile pluto як «вялікае, падобнае на асу чорнае насякомае са сківіцамі як у жука-аленя».

«Выгляд гэтага «лятаючага бульдога», у існаванні якога мы наогул не былі ўпэўненыя, сапраўды захоплівае дух», - сказаў Клэй Болт у інтэрв'ю Guardian.

«Убачыць у рэальным жыцці, якая вялікая і прыгожая гэтая асобіна, пачуць нізкае гудзенне яе крылаў, калі яна праляцела над маёй галавой - гэта было проста неверагодна», - дзеліцца натураліст.

ГІГАНЦКАЯ ПЧАЛА УОЛЕСА (MEGACHILE PLUTO)

Сярэдні размах крылаў асобіны - каля шасці сантыметраў.

Гіганцкая сківіца патрэбна самкам гэтага віду, каб збіраць матэрыял для гнёздаў - асобіна жыве ўнутры тэрмітнікаў, размешчаных у ствалах дрэў, і ізалюе сваё жыллё ад тэрмітаў з дапамогай драўнянай смалы.

Найбуйнейшымі пчоламі ў свеце лічацца толькі самкі гэтай асобіны.

Энтамолаг Прынстанскага ўніверсітэта Ілай Уайман, які ўдзельнічаў у экспедыцыі Болта, спадзяецца, што выяўленне выжылых асобін пчалы падштурхне цікавасць да гэтага віду, і, магчыма, гэтым разам яго ўдасца абараніць ад вымірання.

Насякомае было занесенае ў Міжнародную чырвоную кнігу, але юрыдычна гандаль гэтым відам нішто не абмяжоўвае.

Экспедыцыю падтрымаў фонд Global Wildlife Conservation у рамках праекта па пошуку відаў, якія лічацца вымерлымі.

«Зрабіўшы гэтую пчалу сусветна вядомым сімвалам руху за захаванне відаў, мы забяспечылі ёй лепшую будучыню», - кажа прадстаўнік фонду Робін Мур.