Ярмошына: Калі б у мяне спыталі, я б прызначыла «выбары» на нядзелю - 1 снежня

Якія «выбары» ў Беларусі пройдуць першымі, у ЦВК пакуль не ведаюць.

Пра гэта Лукашэнка абвесціць у красавіку падчас «паслання да народа і парламента». Пра гэта падчас інтэрнэт-відэабрыфінгу на сайце Нацыянальнага прэс-цэнтра заявіла кіраўніца ЦВК Беларусі Лідзія Ярмошына, піша tut.by.

- Закон не забараняе сумяшчаць дзве кампаніі, але ў нас склалася практыка, што прэзідэнцкія «выбары» не сумяшчаюцца ні з якой іншай кампаніяй. Нейкая з кампаній будзе сёлета, нейкая - у 2020. Інтрыга палягае ў тым, што ніхто не ведае, калі пройдуць якія «выбары» і якія будуць першымі. ЦВК не валодае інфармацыяй пра гэта, таямніца будзе адкрытая падчас канстытуцыйнага паслання Лукашэнкі ў красавіку. На ўсялякі выпадак мы рыхтуемся да дзвюх кампаній, - заявіла Ярмошына.

«Выбары» ў «парламент», нагадаем, абвяшчае Лукашэнка, прэзідэнцкія «выбары» - «парламент».

- Хутчэй за ўсё «выбары» будуць не ўлетку, а ўвосень, гэта значыць, абвешчаныя яны будуць у красавіку, вясной. Калі б у мяне спыталі, я б акрэсліла нядзелю - 1 снежня, - заявіла Ярмошына, не ўдакладніўшы, пра якія выбары ідзе гаворка.

Нагадаем, па календары абедзве будучыя выбарчыя кампаніі - прэзідэнцкія і парламенцкія - траплялі на 2020 год. Улада раней заяўляла, што сумяшчаць «выбары» ніхто не будзе. Лідзія Ярмошына патлумачыла гэта так: сумяшчэнне кампаній «выкліча шматлікія моцныя палітычныя турботы». Лукашэнка і зусім назваў гэты будучы перыяд «вакханаліяй». Год таму кіраўніца ЦВК ідэальным часам для першых выбараў называла лістапад 2019 года.

Згодна з Канстытуцыяй выбары прэзідэнта прызначаюцца палатай прадстаўнікоў не пазней, чым за пяць месяцаў і праводзяцца не пазней, чым за два месяцы да заканчэння тэрміну паўнамоцтваў папярэдняга прэзідэнта. То бок, наступныя прэзідэнцкія «выбары» павінны адбыцца не пазней за 30 жніўня 2020 года, парламенцкія - да 6 верасня 2020 года.