«Я стары, а не дурны»: у Гішпаніі патрабавалі падвышэння пенсій

Акцыі пратэсту прайшлі ў Мадрыдзе.

У Гішпаніі тысячы пенсіянераў правялі акцыю з патрабаваннямі павялічыць пенсіі ў адпаведнасці з ростам інфляцыі. Як піша liga.net, пра гэта паведамляе Associated Press.

"Тысячы гішпанскіх пенсіянераў зладзілі шэсце ў цэнтры Мадрыда, патрабуючы падвышэння пенсій", - гаворыцца ў паведамленні.

Многія пратэстоўцы трымалі ў руках плакаты з надпісамі: "Мы ўсе - пенсіянеры", "Я стары, а не дурны".

Яны патрабуюць ад урада, каб пенсійныя выплаты павялічваліся згодна з ростам інфляцыі.

З іхніх слоў, падвышэнне пенсіі на 0,25% у 2017 годзе было недастатковай кампенсацыяй.

"Гэта барацьба, якую мы павінны працягваць, бо нашы патрабаванні не былі выкананыя", - адзначыла 67-гадовая Ізабэль Перэс.

Да акцыі далучыліся і кіроўцы таксі, якія ўжо пратэстуюць цягам 13 дзён у гішпанскай сталіцы, патрабуючы больш жорсткіх правілаў для тых, хто выкарыстоўвае дадаткі, такія як Uber і Cabify.