«Жонка пайшла ад яго, а ён паехаў разбірацца»
11- 10.03.2019, 12:36
- 25,130
Што вядома пра трайное забойства пад Лунінцом, якое здарылася 8 сакавіка.
8 сакавіка ў Лунінецкім раёне скончылася трагічна. У адной з вёсак здарылася бяда: 66-гадовы мужчына ў цешчынай хаце забіў траіх чалавек, а пасля стрэліў сабе ў галаву, але застаўся жывы, піша nn.by.
Вядома, што здарылася ўсё ў вёсцы Азярніца Лунінецкага раёна.
Афіцыйную версію здарэння пакуль не агучваюць. Але мясцовыя жыхары кажуць, што мужчына не быў у гасцях у цешчы, а прыехаў разабрацца з жонкай.
Забойцу клічуць Васіль Ж. Яму 66 гадоў. Жыў мужчына ў Лунінцы, раней працаваў майстрам на заводзе «Палессеэлектрамаш». Там жа працавала і Галіна Б., жанчына родам з вёскі Азярніца.
У Васіля з Галінай закруціўся раман. Пажаніліся. Для Васіля гэта быў другі шлюб.
У пары нарадзіліся двое сыноў.
Пазней, за некалькі гадоў да пенсіі, Васіль звольніўся з завода, пачаў працаваць забойшчыкам жывёлы. У 60 гадоў выйшаў на пенсію. Жонка таксама змяніла працу, была рабочай на хлебакамбінаце.
Васіль з Галінай жылі нармальна, кажуць іх знаёмыя, праблем з алкаголем у мужчыны не было. Нярэдка прыязджалі да цешчы ў Азярніцу, вырошчвалі нешта на агародзе.
Але, паводле пагалосак, апошнім часам жонка пачала здраджваць Васілю.
«Кажуць, яна здраджвала, ён ведаў. Людзі распавядаюць, што перад трагедыяй яны пасварыліся, і Галіна сышла з адной торбай, сказала мужу, што ўсё яму пакідае і сыходзіць ад яго, - кажуць у вёсцы. - Жанчына прыехала ў Азярніцу да маці. У матчыным доме жыў і брат Галіны, 50-гадовы Міхаіл. Ён нідзе не працаваў, часам выпіваў».
Што дакладна здарылася ў вясковай хаце - невядома.
Але мясцовыя кажуць, што 8 сакавіка Васіль узяў стрэльбу i паехаў у Азерніцу. Прычым аўто ў яго не было, г.зн. ехаў ці то на аўтобусе, ці то на спадарожках.
Прычым, у той жа дзень у вёску прыехаў сын Васіля і Галіны разам са сваёй жонкай і цешчай. Але Васіль у той час ці то яшчэ не даехаў да Азярніцы, ці то чакаў, пакуль сын і сваякі з'едуць.
Увечары ў доме засталіся толькі Галіна, яе 50-гадовы брат і іх 78-гадовая маці, цешча Васіля. Ён увайшоў у дом.
Кажуць, мужчына адразу застрэліў сваю жонку Галіну. Цешча паспела схапіць тэлефон і выклікаць міліцыю, але ад хвалявання пераблытала адрас, назвала не той нумар дома.
Цешчу Васіль застрэліў каля тэлефона.
Міхаіл, брат жонкі, спрабаваў бегчы, але на ганку зваліўся - Васіль стрэліў мужчыну ў спіну. Потым падышоў і стрэліў яшчэ адзін раз, у галаву.
Пасля стрэліў у галаву сабе.
Знаёмы Васіля, які калісьці працаваў з ім на заводзе, кажа, што гэта гісторыя - поўная нечаканасць. «Ніхто ніколі б не падумаў, што Васіль такое зробіць», - кажа суразмоўца.
Зараз Васіль ў шпіталі пад канвоем. Ён застаўся жывы. На яго распачалі крымінальную справу, высвятляюцца абставіны здарэння.
Адкуль у Васіля была незарэгістраваная зброя таксама пакуль невядома. Але ў Азярніцы кажуць, што, нібыта брат Васіля працуе падлоўчым, мужчына мог узяць вінтоўку ў яго.