Стваральнік інтэрнэту назваў галоўныя небяспекі Сеціва
- 12.03.2019, 21:17
- 15,634
Цім Бернерс-Лі да 30-годдзя стварэння інтэрнэту апублікаваў адкрыты ліст.
Брытанскі фізік Цім Бернерс-Лі, які з'яўляецца адным са стваральнікаў інтэрнэту, апублікаваў адкрыты ліст з засцярогамі ад злоўжывання магчымасцямі глабальнага Сеціва, паведамляе РБК.
У сваім лісце, апублікаваным на сайце арганізацыі World Wide Web Foundation, Бернерс-Лі адзначае, што глабальная сетка зрабіла зручнейшым жыццё людзей, але пры гэтым нясе небяспеку злоўжывання яе магчымасцямі.
«У той час як Сеціва стварыла новыя магчымасці, дала голас маргінальным групам і зрабіла наша жыццё прасцейшым, яно таксама дала новыя магчымасці ашуканцам, дала голас тым, хто сее нянавісць, і спрасціла магчымасць учыняць злачынствы», - піша навуковец. «Калі мы адмовімся ад стварэння лепшага інтэрнэту цяпер, то не інтэрнэт страціць нас, а мы страцім інтэрнэт», - мяркуе ён.
Галоўнымі небяспекамі, якія сёння зыходзяць ад інтэрнэту і якія трэба вырашыць, Бернерс-Лі назваў:
наўмысныя дзеянні, такія як хакерскія атакі, фундаваныя дзяржавамі і злачынныя паводзіны ў інтэрнэце;
платформы, якія ствараюць заганныя стымулы, заахвочваюць клікбейт i распаўсюджванне дэзінфармацыі;
непрадбачаныя негатыўныя наступствы ад платформаў, якiя ствараюцца з добрымі мэтамі, такія як зніжэнне культуры пры анлайн-зносінах;
Стваральнік інтэрнэт заклікаў развязаць гэтыя праблемы стварэннем новых законаў, мяняць стымулы для карыстальнікаў Сеціва, а таксама пераглядаць існуючыя платформы або магчыма ствараць новыя.
«Вы не можаце проста абвінаваціць адзін урад, адну сацыяльную сетку або чалавечую душу. Спрошчаны падыход рызыкуе знясіліць нашу энэргію, бо мы змагаемся з сімптомамі гэтых праблем замест таго, каб засяродзіцца на іх першапрычынах. Каб зрабіць гэта правільна, нам трэба аб'яднацца ў глабальную вэб-супольнасць», - заклікае Бернерс-Лі.
У 1989 году Цім Бернерс-Лі, які працаваў у той час у CERN (Еўрапейская арганізацыя ядзерных даследаванняў), сумесна з Робертам Каё прапанаваў і рэалізаваў праект, вядомы як World Wide Web (WWW) для абмену звесткамі ўнутры інстытута. Першы вэб-сайт з'явіўся ў CERN у 1990 годзе.