Канстанцін Баравы: Крэмль ментальна рыхтуецца аддаваць Крым

Праз анэксію РФ пачала знікаць з эканамічнай і палітычнай прасторы планеты.

«Мы з вамі возьмем і абавяжам Украіну кампенсаваць тое, што страціў Крым за гэтыя 25 гадоў» – гэта прагучала не ў псіхіятрычнай клініцы. Гэта словы адной з першых асобаў Расейскай Федэрацыі, старшыні Дзярждумы Вячаслава Валодзіна, сказаныя на супольным пасяджэнні Рады Дзярждумы і так званых парламента Крыма і ўрада Севастопаль. Што азначаюць такія заявы, «ФАКТЫ» пацікавіліся ў расейскага апазіцыйнага палітыка Канстанціна Баравога.

– Старшыня Дзярждумы Расеі Вячаслаў Валодзін заявіў, што Расея павінна запатрабаваць ва Украіны кампенсацыю за тыя гады, што Крым быў у складзе нашай краіны. Што гэта абазначае – традыцыйнае вясновае абвастрэнне псіхзахворванняў, пачатак новага вітка агрэсіі (гэтым разам – на міжнародным юрыдычным фронце) ці нешта яшчэ?

– Узнікла даволі дзіўная сітуацыя, калі Украіна, маючы права на кампенсацыю, прадпрымае вельмі слабыя намаганні для яе атрымання. Бо Крым, дзяржаўную ўласнасць, рабуюць, пачалі ўжо нават вывозіць і прадаваць масандраўскія віны. Чэкісты ператварыліся тут ужо ў марадзёраў. І заява Валодзіна – рэакцыя на тое, што Украіна ў судах вельмі слаба прадстаўляе свае інтарэсы: калі Украіна не хоча атрымліваць грошы, давайце паспрабуем яе абвінаваціць, у яе адабраць. Гэта чэкісцкія прапагандысцкія прыёмы. У канцы 1990-х КДБ вінаваціў палітычных лідараў у краінах Балтыі ў тым, што тыя супрацоўнічаюць з КДБ. Цяпер у тым жа духу злодзей абвінавачвае таго, каго ён абрабаваў.

– Першы паўюбілей – 5-годдзе – анэксіі Крыма ў Расеі адзначаюць, але ўжо нібыта не так маштабна, як мінулыя гадавіны. Гэта эканомія грошай, паказнік таго, што эйфарыя ад «Крымнаш» спадае, пераарыентацыя на нейкія іншыя мэты?

– Далучэнне Крыма мела вельмі кароткатэрміновы прапагандысцкі эфект. У той самы час гэта нанесла каласальныя страты Расеі. РФ пачала знікаць з эканамічнай і палітычнай прасторы планеты. У Крамлі спадзяваліся, што ўсё адбудзецца, як з Абхазіяй, Прыднястроўем. Ці прынамсі як з Паўднёвай Асеціяй. Але ў гэтым выпадку ўсё атрымалася інакш. І разуменне гэтага ўжо прыйшло або прыходзіць да грамадзянаў Расеі. Я не кажу ўжо пра крымчанаў, якія перад далучэннем пераводзілі расейскія заробкі ў грыўні, а потым у думках падлічвалі, колькі яны змогуць набыць ва ўкраінскіх крамах за гэтыя грыўні. Цяпер жа крымчане сутыкнуліся з рэальнасцю – такое вывучэнне эканамічных і палітычных заканамернасцяў на ўласным прыкладзе. Ведаеце, як у прыказцы пра тое, што на сваіх памылках вучацца дурні, а разумныя – на памылках іншых. Гэта той самы выпадак.

Прапагандысцкі эфект ужо вельмі слабы. А сусветнай супольнасцю гэтая пыхлівая ідэя Пуціна названая міжнародным злачынствам. Кіраўніцтва Расеі ўсё больш і больш пераконваецца, што ўрэшце Крым давядзецца аддаваць назад. І яны да гэтага ментальна рыхтуюцца.