У Гомелі ў «дармаедкі» запісалі жанчыну за два месяцы да пенсіі

Пісьменніца Ніка Ракіціна мае намер змагацца з незаконнай пастановай.

Пра тое, што яна «не занятая ў эканоміцы», Людміла Багданава даведалася з паведамлення ад так званай «дармаедскай» камісіі Цэнтральнага раёна абласнога цэнтра. Пікантнасць сітуацыі ў тым, што гамяльчанка літаральна ўжо ў чэрвені дасягне пенсійнага веку, а значыць, будзе ўважацца занятай у эканоміцы, піша «Гомельская вясна».

56-гадовая жанчына пастанавіла змагацца з незаконным дэкрэтам і звярнулася па дапамогу ў незалежны прафесійны звяз РЭП:

– Я пачынала працаваць з 18 гадоў, робячы перапынкі толькі на напісанне дысертацыі і выхаванне дзяцей. Працавала ў школе, у палацы творчасці. Фактычна, калі б не павышэнне пенсійнага веку, я была б ужо на пенсіі.

Людміла Багданава вядомая як пісьменніца Ніка Ракіціна, апошнім часам займаецца напісаннем кніг.

– Вядома, мне далёка да Льва Талстога, але мае кнігі даволі ахвотна выдаюцца ў Гомелі. Цяпер рыхтуецца да выхаду новая кніга. Наклады невялікія, але такія рэаліі беларускіх пісьменнікаў, шмат не заробіш. Жыву практычна на заробак свайго мужа.

Пісьменніца атрымала паведамленне, дзе ёй да 30 красавіка прапануюць падаць дакументы, якія даказваюць, што яна працуе. Разам з незалежным прафзвязам жанчына падала скаргі ў гарвыканкам і раённую адміністрацыю.

Прававы інспектар працы прафзвязу Леанід Судаленка пракаментаваў сутнасць прэтэнзій:

– Прафзвяз РЭП меркаваў і мяркуе, каб удзельнічаць у эканоміцы, дастаткова з'яўляцца спажыўцом тавараў і паслуг, у тым ліку і падакцызных, плацельнікам дзяржаўных збораў і мытаў. Іншымі словамі, без залежнасці ад сваёй занятасці, Людміла Багданава занятая ў эканоміцы, бо ўвесь час выплачвае ўскосныя падаткі пры набыцці тавараў і паслуг, пры карыстанні мабільнай сувяззю.

У скарзе Людміла Багданава просіць патлумачыць, з якой мэтай дзяржава абмяжоўвае яе ў праве на выбар роду заняткаў, у праве не цярпець ад прымусовай працы і забароненай дыскрымінацыі, умешваючыся ў яе прыватнае жыццё і прыватнае жыццё ейнай сям'і.

Таксама Людміла Багданава патрабуе паставіць перад Канстытуцыйным судом пытанне пра тое, што Дэкрэт №3 парушае Канстытуцыю; прызнаць яе занятай у эканоміцы і абавязаць камісію ў спрыянні занятасці выключыць яе з базы звестак.