Беларускіх пастаўшчыкоў санкцыйных прадуктаў у РФ пасадзілі ў турму

З моманту ўвядзення РФ прадуктовага эмбарга ў Беларусі распачалі 30 крымінальных спраў.

Суд у Гомелі вынес прысуд грамадзянам Беларусі, што зарабілі на пастаўках санкцыйнай прадукцыі ў Расею мільёны даляраў. З моманту ўвядзення прадуктовага эмбарга ў Беларусі распачалі не менш за 30 крымінальных спраў. Рассельгаснагляд у красавіку забараніў увоз з Беларусі яблыкаў і груш, піша ВВС.

Як паведамілі ва УУС Гомельскага аблвыканкама, удзельнікі двух арганізаваных злачынных груп пазбаўленыя волі на тэрміны ад трох да шасці гадоў, «у залежнасці ад віны кожнага». Колькасць асуджаных пры гэтым не ўдакладняецца.

Асуджаныя распрацавалі і рэалізавалі схему, па якой садавіна з Турцыі і сыры з Украіны паступалі ў Беларусь, афармляліся на мытні, а затым з пераклеенымі этыкеткамі, на якіх значыліся беларускія вытворцы, адпраўляліся ў буйныя расейскія таварныя сеткі альбо расейскім прадпрымальнікам, вынікае з паведамлення.

Арганізатар адной з груп з чэрвеня 2016 да сакавік 2017 года заключыў з расейцамі кантракты на суму 15,5 млн даляраў і адправіў у Расею 154 партыі турэцкіх садавіны і ўкраінскіх сыроў.

Другая група займалася толькі сырам і паспела адправіць у Расею 85 партый цвёрдых сыроў украінскай вытворчасці на суму 12 млн даляраў і 2 млн еўраў.

Не адзіны выпадак

З моманту ўвядзення Расеяй прадуктовага эмбарга ў Беларусі распачалі 30 крымінальных спраў за спробу паставак санкцыйных прадуктаў паводле падробленых дакументаў, прадухілены ўвоз у Расею забароненай там прадукцыі на больш чым 21 мільён даляраў, паведамляў беларускі Дзяржаўны мытны камітэт у сярэдзіне мінулага года.

Пра колькасць праведзеных мерапрыемстваў у прадухіленні паставак санкцыйнай ежы рэгулярна дае справаздачу Камітэт дзяржаўнага кантролю Беларусі. Пракуратура рэгулярна інфармуе пра распачынанне крымінальных спраў супраць удзельнікаў ашуканскіх схем паставак прадуктаў у Расею.

У сярэдзіне студзеня амбасадар Расеі ў Беларусі Міхаіл Бабіч заяўляў, што Расея працягвае страчваць мільёны даляраў праз пастаўкі праз Беларусь тавараў, забароненых да ўвозу. Для гэтага, казаў Бабіч, выкарыстоўваецца ілжэтранзіт, кантрабанда і маніпуляцыі з прыніжэннем ПДВ.

«Дзеля справядлівасці трэба прызнаць, што злачыннасць - гэта рэч інтэрнацыянальная, удзельнічаюць ашуканцы з абодвух бакоў у рэалізацыі гэтых схем», - сказаў тады расейскі амбасадар.

Яшчэ Бабіч паведаміў, што летась пачала працаваць сістэма «Меркурый», якая дазваляе адсочваць ланцужкі паставак сыравіны да прылаўка, хоць закрыць транзітнае акно і шчыліны для нядобрасумленных пастаўшчыкоў дагэтуль не ўдалося.

Яблыкі і грушы

Рассельгаснагляд з 12 красавіка забараніў увоз з Беларусі яблыкаў і груш, заявіўшы, што пад выглядам беларускай прадукцыі ў Расею могуць пастаўляцца тавары з краін, у дачыненні да якіх уведзены харчовыя санкцыі.

Кіраўнік Рассельгаснагляду Сяргей Данкверт заяўляў, што расейскімі кантралюючымі органамі за першы тыдзень красавіка было затрымана 36 машын з Беларусі з прадукцыяй без дакументаў. Акрамя таго, было затрымана 66 машын з яблыкамі і грушамі, сертыфікаваных фітасанітарнай службай Беларусі як садавіна беларускага паходжання. Хоць летась «беларускія калегі нам заяўлялі, што айчынныя яблыкі і грушы ў іх скончыліся яшчэ ў лютым», - абураўся Данкверт.

Лукашэнка эмацыйна адрэагаваў на гэтую забарону, даручыўшы ўраду паставіць на рамонт нафтаправоды з расейскай нафтай, што ідуць праз краіну на захад.

«Таму што тое дабро, якое мы робім для Расейскай Федэрацыі, яно нам вяртаецца пастаянна злом. Там ужо знахабіліся да такой ступені, што пачынаюць нам выкручваць рукі», - заявіў на нарадзе Лукашэнка.

«Ці то моркву, ці то салату, ці то ўжо агуркі не спадабаліся. Ці то ў іх падазрэнне ёсць, што мы нешта не пастаўляем адтуль. І кожны дзень адбываецца закрыццё нашых прадпрыемстваў. Нам закрываюць рынак, - абураўся Лукашэнка. - Самі знаходзяцца пад санкцыямі і асуджаюць гэта, і я тут іх абсалютна падтрымліваю. Але ў той жа час падобным зброяй ваююць супраць найбліжэйшых сваіх хаўруснікаў».

Раней Лукашэнка раіў Маскве шукаць вінаватых у пастаўках забароненай прадукцыі перш за ўсё ў Расеі: «санкцыйны рэжым расейскі - галаўны боль для нас. Робім шалёную працу ў інтарэсах Расеі. А як тут мытнікі кажуць і іншыя, там жа ідзе звадка пастаянна - хтосьці заказвае нейкія матэрыялы, яны пачынаюць нам выстаўляць прэтэнзіі».

Спасылаючыся на «інфармацыю спецслужбаў», беларускі дыктатар распавядаў, што «кіруюць усімі негатыўнымі працэсамі, звязанымі з санкцыйнай прадукцыяй» расейскія кампаніі - «часам буйныя, за якімі стаяць буйныя дзялкі з цяжкімі пагонамі».