У Менску затрымалі расейскага бізнэсоўца, былога мужа экс-салісткі «ВІА Гра»

Уладзімір Самсоненка знаходзіцца ў СІЗА.

У Менску ў сакавіку затрыманы расейскі бізнэсовец, былы муж экс-салісткі гурту «ВІА Гра» Санты Дзімопулас Уладзімір Самсоненка. З 22 сакавіка 2019 года Уладзімір Самсоненка знаходзіцца ў СІЗА.

Як паведаміў tut.by адвакат Самсоненкі Яўген Маслаў, ягоны падабаронны затрыманы на запыт праваахоўных органаў Малдовы, якія абвясцілі Самсоненку ў міжнародны вышук за ўчыненне злачынстваў, прадугледжаных арт.27, 145 і 164 КК Малдовы (Замах на ўчыненне злачынства - забойства і выкрадання чалавека).

Бацька затрыманага, Віталь Самсоненка, упэўнены, што ў справе сына шмат недапасаванняў. Уладзіміра Самсоненку абвінавачваюць у тым, што у 2019 годзе ён, нібыта ўступіўшы ў злачынную змову з грамадзянінам П. (змешчаным на той момант у турму) і іншымі нявызначанымі асобамі, арганізаваў і кіраваў дзеяннямі албанскіх наймітаў, рабіў замах на забойства і выкраданне чалавека.

«Майму сыну ставяць у віну тое, што ён хацеў вызваліць з турмы П. пры дапамозе тых жа албанскіх наймітаў, для чаго павінен быў учыніць забойства высокапастаўленага малдаўскага чыноўніка і выкрадання ягоных непаўналетніх дзяцей. Цікава, што ў якасці довадаў віны сына прыводзіцца зашыфраваная перапіска з месцаў пазбаўлення волі з выкарыстаннем мабільнага тэлефона», - кажа Самсоненка-старэйшы.

«Гэта значыць, у малдаўскай турме, выяўляецца, можна карыстацца мабільнымі тэлефонамі, а забойства і замах можна арганізаваць падчас тэлефанавання, не пакідаючы цягам года Беларусь. Мой сын - сумленны і прыстойны чалавек, не знаёмы ні з якімі крымінальнымі малдаўскімі і албанскімі элементамі. Нават ні разу не быў у гэтых краінах. Гэта нейкі дэтэктыў, напісаны на замову», - здзіўляецца бацька затрыманага.

Віталь Самсоненка запэўнівае, што ягоны сын планаваў прыцягнуць у Беларусь «замежныя інвестыцыйныя сродкі буйных фінансавых кампаній». «І як толькі ён выйшаў на фінальны этап гадавой працы, адбываецца ягонае затрыманне», - адзначае Самсоненка-старэйшы.

Уладзімір Самсоненка нарадзіўся ў 1979 годзе, з'яўляецца грамадзянінам Расеі. Па спецыяльнасці юрыст-правазнаўца. Навучаўся ў Венскім універсітэце эканомікі і бізнэсу. Суўладальнік групы кампаній UP.ME Consulting&Marketing, ltd. Раней знаходзіўся ў шлюбе з Сантай Дзімопулас (экс-салісткай гурта «Віа Гра»), жанаты, мае дваіх малалетніх дзяцей.

З траўня 2018 года Уладзімір увесь час пражываў у Беларусі, дзе зарэгістраваў арганізацыю ТАА «Салвейшн» (інвестыцыйны крыптафонд і аператар крыптавалют).