Відэафакт: У Гарадзенскай вобласці магутным ліўнем змыла дарогу

Такой маштабнай стыхіі мясцовыя жыхары нават не памятаюць.

Вёску Канчаны ў Бераставіцкім раёне падтапляе не першы раз. Але такой магутнай залевы, якая за некалькі хвілін даслоўна змыла частку дарогі і агароды на мясцовых падворках, як кажуць мясцовыя жыхары, не было ніколі. Цяпер пацярпелую ад удару стыхіі праезную частку ўмацавалі дарожнікі, але спецыялісты кажуць, што гэта часовае развязанне. Неўзабаве дарогу адрамантуюць цалкам. Зараз жа адкрыты рух толькі па адным баку вясковай вуліцы, паведамляе tut.by.

- На сёння там дарога пазначаная адмысловымі знакамі, а з аднаго боку можна праехаць. Гэта часовае развязанне. Найбліжэйшыя дні дарожнікі абяцаюць усё аднавіць, - распавялі ў Бераставіцкім сельсавеце. Там дадалі, што мястэчка і раней падтапляла, але мясцовыя жыхары такіх разбурэнняў не памятаюць.

Адцінак дарогі ў вёсцы Канчаны быў пашкоджаны 27 красавіка. Плошча разбурэння - 2 метры ўшыркі і блізу 25 метраў у даўжыню.

- У выніку багатага выпадзення ападкаў і сходу вады з палёў дрэнажная труба не справілася з аб'ёмам вады - і адбыўся пераліў вады праз праезную частку з наступным падмываннем грунту, - паведамляла МНС.

Праезд па аднапалосным адцінку дарогі быў адноўлены ўночы 28 красавіка.

Папярэдні такі ж, але не такі моцны, патоп быў у вёсцы ў траўні 2017 года. Тады ў МНС звярталіся мясцовыя жыхары. Яны скардзіліся на падтапленне калодзежаў і скляпоў.

Як распавёў «Гродзенскай праўдзе» галоўны інжынер КУП «Гроднааблдарбуд» Сяргей Слінка, інстытуту «Гроднадарпраект» даручана ў тэрміновым парадку распрацаваць праект аднаўлення адцінку вуліцы, вызначыць патрэбны дыяметр трубы. Таксама будзе адноўлена пакрыццё на ўсім пашкоджаным участка.

Акрамя гэтага, праводзіцца абследаванне подступаў да трубы і пры патрэбе тут будуць праведзеныя меліярацыйныя працы з кладкай дрэнажу.