У Беларусі легалізавалі вакцыну «Эўпента»
9- 17.05.2019, 18:44
- 16,062
Ужо зрасходавана больш за 50 тысяч вакцын, пабочных рэакцый не выяўлена.
Шум вакол карэйскай вакцыны «Эўпента» ўзнік мінулым летам: пасля вакцынацыі памерла дзіця. Пазней следства дало заключэнне: былі парушэнні пры закупцы і рэгістрацыі прэпарата, але са смерцю дзіцяці гэта не звязана. Між тым, нядаўна «Эўпента» была ціха зарэгістраваная на тэрыторыі нашай краіны. Мяркуючы паводле звестак Цэнтра экспертыз і выпрабаванняў у ахове здароўя, адбылося гэта 1 сакавіка, піша «Онлайнер».
Нагадаем, 13 жніўня мінулага года ў Ганцавіцкім раёне праводзілася планавая вакцынацыя двухмесячнага хлопчыка. Вакцынай «Імавакс Поліа» і «Эўпента», якія ўводзіліся дзіцяці, на той момант былі дазволеныя Міністэрствам аховы здароўя. Пасля некалькіх прышчэпак дзіця стала задыхацца і памерла.
Праз паўгода былі апублікаваныя вынікі праверкі СК: магчымасці прадбачыць алергічную рэакцыю перад увядзеннем вакцыны не мелася, паталагічны працэс развіваўся непрадказальна. Парушэнняў, звязаных непасрэдна з увядзеннем вакцын, не было ўстаноўлена.
Спецыяльная камісія Міністэрства аховы здароўя ўстанавіла тады шэраг парушэнняў ведамасных нарматыўных актаў у частцы вядзення медыцынскай дакументацыі, а таксама інфармавання бацькоў аб магчымых пабочных эфектах.
У той жа час СК праверыў, як набывалі прэпарат «Эўпента», і знайшоў «парушэнні працэдуры закупкі, звязаныя з недасканаласцю заканадаўства і прадыктаваныя аб'ектыўнай неабходнасцю набыцця вялікай колькасці вакцыны ў самыя кароткія тэрміны». Але, зноў жа, сувязі гэтай акалічнасці са смерцю дзіцяці не выявілі.
З дакументацыі на вакцыну тады меліся карэйскія завадскія сертыфікаты, але нацыянальную сертыфікацыю на той момант правесці не паспелі - трэба было чымсьці тэрмінова замяшчаць расейскую вакцыну, з пастаўкамі якой узніклі перабоі.
Увесь гэты час медыкі працягвалі выкарыстоўваць карэйская прэпарат, вакцынаваныя тысячы дзяцей. Фактычна, 1 сакавіка «Эўпента» была легалізаваная ў нашай краіне.
Рэгістрацыя дзейнічае пяць гадоў.
Прэс-сакратарка Міністэрства аховы здароўя Юлія Ваніна дапоўніла, што быў праведзены неабходны комплекс тэхнічных работ, якія папярэднічаюць дзяржаўнай рэгістрацыі лекавага сродку. Між іншым, гэта хіміка-фармацэўтычная і клініка-фармакалагічная экспертыза рэгістрацыйнага дасье, экспертыза дакументаў па эфектыўнасці, бяспекі лекавага сродку, апрабацыя методык кантролю якасці. Праведзена інспектаванне вытворчасці ў Рэспубліцы Карэя на адпаведнасць патрабаванням Належнай вытворчай практыкі (GMP) Беларусі. У выніку Міністэрства аховы здароўя прыняло пастанову аб выдачы дзяржаўнай рэгістрацыі лекавага сродку «Эўпента».
З тых часоў, паводле звестак на 13 траўня, ужо зрасходавана больш за 50 тысяч вакцын. Юлія Ваніна паведаміла, што на сённяшні дзень у Цэнтр экспертыз і выпрабаванняў у ахове здароўя не паступала інфармацыі аб пабочных рэакцыях на ўвядзення гэтага сродку.