19 чэрвеня 2019, Серада, 21:05
Мы ў адной лодцы
Рубрыкі

Новыя версіі следства па справе аб забойстве інспектара ДАІ

ВУЛІЦА Ў РАЁНЕ ЧАПАЕЎКА Ў МАГІЛЁВЕ, ДЗЕ ЖЫВУЦЬ ЦЫГАНЫ
ФОТА: «РАДЫЁ СВАБОДА»

Праваабаронца - пра расследаванне рэзананснага забойства пад Магілёвам.

Былы следчы пракуратуры Алег Воўчак ацаніў прафесіяналізм міліцыі і следчых, якія займаюцца расследаваннем забойства інспектара ДАІ Яўгена Патаповіча, паведамляе «Белсат».

- Якія шанцы раскрыць гэтую справу, улічваючы, што на трэці дзень пасля забойства падазраваных яшчэ няма?

- Гэта нармальны працэс следства: ён ідзе два месяцы, а потым разглядаецца пытанне аб падаўжэнні папярэдняга следства. Гэта стандартная практыка: працуюць, шукаюць.

Калі правільна агледжанае месца здарэння, калі сабраць довады і правесці аператыўныя мерапрыемствы, то [злачынцаў] можна знайсці і праз пяць, і праз дзесяць гадоў. У маёй практыцы было забойства, якое раскрылі праз 15 гадоў. Галоўнае, каб усё было сабрана прафесійна: довады, тэлефонныя званкі, якія былі ў гэтым раёне, сляды колаў, паламаныя галінкі.

- Наколькі прафесійным выглядае расследаванне, калі меркаваць з таго, што заяўляе пра гэта сам Следчы камітэт?

Дрэнна, што няма ніякай канферэнцыі Следчага камітэта, на якой хоць бы распавялі, што яны зрабілі напярэдадні, якія вышуковыя мерапрыемствы правялі.

Мне не падабаецца тое, што ўсіх цыганоў у Беларусі пачалі тузаць і затрымліваць без нагоды і прычын. Цыганы пачалі хавацца па кватэрах, бо баяцца збіцця і затрымання. Гэта непрафесійная праца. Так не ловяць злачынцаў.

Вы першым заявілі, што версія з «цыганамі на чорнай «Волзе» можа быць ілжывым следам. Чаму аблавы на цыганоў прадаўжаюцца, нягледзячы на тое, што не прыярытэтнай гэтую версію прызнаў таксама Следчы камітэт?

Гэта праблема адсутнасці нармальнага кіраўніцтва Следчага камітэта на месцах. Раней такімі справамі кіравалі пракуроры.

Падчас маёй працы ўсё рабілася нашмат больш пісьменна – што да цяжкіх злачынстваў у нас былі штодзённыя нарады, на якіх абмяркоўваліся ўсе магчымыя версіі. Натуральна, у нас ніколі не было адной версіі - звычайна мы распрацоўвалі ад пяці да сямі.

Наколькі я бачу, у гэтай справе цыганскага следу зусім магло не быць.