На гэтым тыдні ў Беларусі будзе гарачэй, чым у Афрыцы

Праз змены клімату ў Беларусі пасяліліся цеплалюбныя жывёлы і кузуркі.

Сёлета лета пачалося на месяц раней: травень выдаўся амаль на градус вышэйшым за кліматычную норму. Не менш гарачым абяцае быць і чэрвень. Толькі на першым летнім тыдні ў краіне можна было пачуць звон пабітых тэмпературных рэкордаў. А 9 чэрвеня тэрмометры ў Брагіне паказвалі 32,1 градуса! Такой спёкі ў гэтых месцах не было 30 гадоў, піша kp.by.

Знясільваючая спякота пацвярджаецца статыстыкай. Белгідрамет паведамляе, што сярэднедзённая тэмпература перавышае кліматычную норму на 4-5 градусаў. І паводле прагнозаў, спёка толькі ўзмоцніцца: на гэтым тыдні ў краіне прагназуецца да 34 градусаў, пераважна без ападкаў. Дарэчы, нават у Афрыцы будзе трошкі халадней. Напрыклад, тэрмометр на афрыканскім курорце ў Марока не пакажа вышэй за 23 градусы. Аналагічная сітуацыя складваецца і на Мадагаскары.

Нягледзячы на тое, што лета толькі пачалося, надвор'е ўжо паспела наламаць нямала дроў. Афіцыйна купальны сезон адкрыўся 1 чэрвеня, але ў краіне з пачатку года ўжо патанула 90 чалавек. У сувязі з цёплымі няўстойлівымі паветранымі масамі аранжавы ўзровень небяспекі абвяшчаўся 5 разоў за 10 летніх дзён. Праз высокі ўзровень пажарнай небяспекі ў 13 раёнах Беларусі дзейнічае забарона на наведванне лясоў. І гэта не мяжа.

- Тыдзень будзе гарачы, а ападкаў будзе няшмат. Таму імаверна, што пад забарону патрапіць яшчэ больш раёнаў, - пракаментаваў Аляксандр Бяганскі, начальнік службы метэапрагнозаў Белгідрамета.

У апошнія гады праз змену клімату ў Беларусь перабраліся цеплалюбныя жывёлы і кузуркі. У 2018 годзе Гомельшчына біла ў набат праз нашэсце вялікіх касматых павукоў. Яны гнездаваліся непадалёк ад дзіцячых пляцовак і запаўзалі ў дамы ў Лельчыцкім раёне. Павукамі выявіліся паўднёварасейскія тарантулы - мясцовыя жыхары Сярэдняй Азіі.

Адразу ў некалькіх рэгіёнах Беларусі людзі пачалі знаходзіць багамолаў - выхадцаў з тропікаў і субтропікаў. Адным з апошніх нашумелых адкрыццяў стаў доказ існавання залацістага шакала - звера заўважылі ў Кобрынскім раёне.