Навукоўцы: На Зямлі ўжо адбывалася глабальнае пацяпленне
4- 12.06.2019, 19:10
- 17,893
Блізу 183 мільёнаў гадоў таму, у часы дыназаўраў, Зямля пацяплела на 7 градусаў Цэльсія.
Гэта быў час значных змен, які атрымаў назву «таарская кліматычная падзея». Пра яго ведаюць дзякуючы марскім адкладам, піша mail.ru.
У гэты час у выніку вывяржэнняў вулканаў у атмасферу трапіла многа вуглякіслага газу, што параўнальна з глабальным пацяпленнем у выніку чалавечай дзейнасці.
Розніца ў 7 градусаў здаецца невялікай, але на самой справе гэта розніца паміж ледніковым перыядам і сённяшнім днём. Жывыя арганізмы прыстасаваныя жыць у вызначаным дыяпазоне тэмператур, таму раптоўнае змяненне можа апынуцца для іх смяротным.
Даследаванні таарскай кліматычнай падзеі былі сканцэнтраваны на наступствах для акіяна. А вось што адбывалася на сушы, практычна не вывучана.
Апошнія даследаванні, апублікаваныя групай міжнародных навукоўцаў у Nature Geoscience, паказалі, што ад павышэння тэмператур моцна пацярпелі лясы. Каля паловы даследаваных відаў старажытных раслін зніклі, у тым ліку шмат іглічных раслін і папараці. Масавае красаванне багавіння ў вадаёмах прывяло да памяншэння колькасці кіслароду ў вадзе, вымірання планктону і шматлікіх жывёл. Да такіх высноў навукоўцы прыйшлі, вывучыўшы блізу 40 тысяч мікраскапічных закамянеласцяў пылка, спор і планктону са скал Паўночнага Ёркшыра.
«Наша даследаванне паказвае, што хуткае глабальнае пацяпленне можа мець сур'ёзныя доўгатэрміновыя наступствы для сушы і мора адначасова», - кажа прафесар Рычард Твітчэт з Музея натуральнай гісторыі ў Вялікабрытаніі.
Разуменне таго, як экасістэмы Зямлі рэагавалі на такія змены ў мінулым, можа дапамагчы чалавецтву з наступствамі глабальнага пацяплення ў будучыні, кажуць даследнікі.