Памерла былая віцэ-прэм'ерка БССР Ніна Мазай
- 26.06.2019, 21:32
- 9,422
Беларуская дзяржаўная дзяячка і дыпламатка памерла на 70 годзе жыцця.
Пайшла з жыцця былая намесніца старшыні Савета Міністраў Беларусі, дыпламатка Ніна Мазай.
Пра гэта паведамілі ў Міністэрстве замежных спраў.
«Выказваем глыбокія спачуванні родным і блізкім выдатнай дзяржаўнай дзяячкі, ветэрана дыпламатычнай службы, Надзвычайнай і Паўнамоцнай Амбасадаркі Беларусі Мазай Ніны Мікалаеўны, якая пайшла з жыцця», - адзначылі ў МЗС.
Ніна Мазай скончыла гістарычны факультэт БДУ. Была сакратаркай Жабінкаўскага райкама камсамола, у 1977-1985 гадах - сакратаркай, першай сакратаркай Берасцейскага абкама камсамола, першай сакратаркай ЦК камсамола.
У 1985-1991 гадах яна займала пасаду намесніцы старшыні Савета Міністраў БССР. Затым у якасці Надзвычайнай і Паўнамоцнай Амбасадаркі ўзначальвала беларускія дыпламатычныя місіі ў Францыі і Канадзе, была сталым прадстаўніком Беларусі пры ЮНЕСКА. З 1997 да 1999 года працавала намесніцай міністра замежных спраў Беларусі.