Лукашэнку ў Маскве двойчы «прад'явілі» за нафту

Візіт атрымаўся нязручным.

У Расіі няма і не можа быць прэтэнзій да свайго беларускага саюзніка. Аляксандр Лукашэнка сам так сказаў. Відаць, таму што ў Расіі пра гэта не былі ў курсе. Праўда, тлумачыцца наконт адсутнасці прэтэнзій за час двухдзённага візіту давялося двойчы. Спачатку — прэм'ер-міністру Міхаілу Мішусціну, а потым і Уладзіміру Пуціну. Дык што, можа, прэтэнзій і няма, але, здаецца, некаторыя пытанні ўсё ж ёсць.

«Думаю, і вам няма за што прад'явіць прэтэнзіі да Беларусі. Павінен яшчэ раз публічна вас запэўніць, што ўсё, што мы намецілі, выконваецца і будзе выканана. Ад дробязяў з палівам — дызелем, рознымі бензінамі і гэтак далей», — сказаў Лукашэнка на сустрэчы з Мішусціным.

Мішусцін пра адсутнасць прэтэнзій да саюзніка нічога не сказаў. Абмежаваўся глыбокім задавальненнем з нагоды сістэмнага росту тавараабароту. Таму на наступны дзень пра вернасць саюзніцкаму доўгу давялося тлумачыць ужо Пуціну.

«Што да бягучых пытанняў, мы свята выконваем усе нашыя дамоўленасці, пачынаючы ад сельскай гаспадаркі, прадуктаў харчавання, паліва», — сказаў Лукашэнка.

То-бок, дзе цяпер пачынаецца выкананне дамоўленасцяў, нібыта зразумела. З сельскай гаспадаркі, прадуктаў харчавання і паліва. А вось дзе яно заканчваецца, поўнай яснасці пакуль няма. Дый нават што да пачатковага этапу поўная яснасць ёсць толькі ў Лукашэнкі. Пуцін, здаецца, крыху сумняваецца.

«Дынаміка нашых адносінаў такая, што ўвесь час з'яўляюцца новыя і новыя моманты, на якія трэба звярнуць увагу, узгадніць, адрэгуляваць», — сказаў Пуцін.

Звярнуць увагу можна, напрыклад, на бензін. У чэрвені і ліпені Беларусь па-саюзніцку дапамагла Расіі пастаўкамі паліва. За два месяцы толькі бензіну прадала 350 тысяч тон. Паводле слоў пуцінскага Пяскова, у жніўні пастаўкі таксама былі максімальнымі.

Але з верасня «Нафтан», зусім не па-саюзніцку, збіраецца спыніцца на планавы прафілактычны рамонт. Улічваючы, што з паліўным крызісам у Расіі ўсё толькі пачынаецца, тут сапраўды ёсць што рэгуляваць. Бо вербальнымі інтэрвенцыямі пра адсутнасць прэтэнзій бензінавы дэфіцыт не закрыеш.

Не кажучы ўжо пра галоўную праблему саюзнікаў. Вызначальную праблему, якую трэба рашуча вырашаць. Па імені яе называць не трэба.

«На перспектыву пагаворым пра нашу агульную праблему, якую нам даводзіцца вырашаць на поўдні Беларусі і на захадзе Расійскай Федэрацыі. Насамрэч — праблема. Але мы яе вырашым. Мы яе вырашым, як бы камусьці гэтага ні хацелася, — сказаў Лукашэнка Мішусціну. — Таму жадаю нам, бо ўсе пытанні даводзіцца вырашаць разам, каб мы спраўляліся з гэтымі праблемамі».

Што ў Расіі на захадзе, а ў Беларусі на поўдні? На «У» пачынаецца, на «а» заканчваецца. Калі ў вас ёсць правільны адказ, лепш пакіньце яго пры сабе.

Андрэй Бранішэўскі, planbmedia.io

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com