Ва Украіне прыняты закон, які спросціць атрыманне грамадзянства беларускім добраахвотнікам

За законапраект прагаласавалі 230 народных дэпутатаў Вярхоўнай Рады. 

Вярхоўная Рада Украіны прыняла 6 чэрвеня ў другім чытанні і ў цэлым з тэхніка-юрыдычнымі праўкамі законапраект №3433 "Аб унясенні змяненняў у некаторыя заканадаўчыя акты (з нагоды прававога статусу замежнікаў і асоб без грамадзянства, якія бралі ўдзел у абароне тэрытарыяльнай цэласнасці і недатыкальнасці Украіны)", піша карэспандэнт "Гордан".

За прагаласавалі 230 народных дэпутатаў.

Ініцыятарам дакумента выступіў у 2015 годзе пазафракцыйны народны дэпутат Андрэй Білецкі.

"Мэтай гэтага законапраекта з'яўляецца ўрэгуляванне пытання аб прызнанні замежнікаў і асоб без грамадзянства, якія бралі ўдзел у абароне тэрытарыяльнай цэласнасці і недатыкальнасці Украіны і знаходзяцца на тэрыторыі Украіны на законных падставах, спрошчанага парадку выдачы такім асобам грамадзянства або выдачы такім асобам дазволу на жыхарства ва Украіне на час удзелу ў абароне тэрытарыяльнай цэласнасці і недатыкальнасці Украіны", – сказана ў тлумачальнай нататцы да дакумента.

Таксама пазначана, што мэтай законапраекта з'яўляецца "абарона правоў і законных інтарэсаў тых замежнікаў, якія абаранялі тэрытарыяльную цэласнасць Украіны і з'яўляюцца грамадзянамі дзяржавы-агрэсара або іншых дзяржаў, якія не прызнаюць тэрытарыяльную цэласнасць Украіны, у сувязі з чым іх добраахвотнае або прымусовае вяртанне ў краіну сваёй грамадзянскай прыналежнасці парушыць іх правы".

Нагадаем, беларускія добраахвотнікі звярнуліся да прэзідэнта Украіны Уладзіміра Зяленскага з просьбай даць ім украінскае грамадзянства.

«Многія з нашых хлопцаў цяпер параненыя, патрабуюць лячэння. Яны не маюць юрыдычнай абароны, права на юрыдычную дапамогу. Я мяркую, што гэта, як мінімум, ганебна для дзяржавы, якую мы прыехалі абараняць", - сказаў Ян Мельнікаў, баец тактычнай групы "Беларусь", які бярэ ўдзел у канфлікце з 2014 года.