Сем фактаў пра міленіялаў: што трэба ведаць працадаўцам і прадаўцам?

Міленіялаў ужо больш за палову на Зямлі.

Міленіялаў - маладых людзей, якія нарадзіліся ў перыяд з 1983 да 1994 года, а таксама прадстаўнікоў пакалення Z (якія з'явіліся на свет паміж 1995 і 2002 гадамі) больш за палову на Зямлі. Гэта не будучыня, гэта ўжо сучаснасць, піша ў сваім даследаванні Deloitte.

Кампанія апытала больш за 13 тысяч міленіялаў з 42 краін і трох тысяч людзей пакалення Z з 10 краін, паведамляе frankrg.com.

Пра што карысна ведаць працадаўцам маладога пакалення, а таксама тым, хто прадае ім тавары і аказвае паслугі?

Прыярытэты. Нараджэнне дзяцей, купля дамоў і іншыя традыцыйныя «маркеры поспеху» не ўваходзяць у лік прыярытэтаў сучаснай моладзі. На першым месцы - падарожжа. Пра жаданне ўбачыць свет заявілі 57% апытаных з кожнай групы. Крыху менш (56% і 52% рэспандэнтаў) імкнуцца да добрага заробку і фінансавага дабрабыту. Сярод міленіялаў менш за палову (49%) хочуць набыць уласнае жыллё, 46% ставяць мэтай станоўча ўплываць на грамадства і 39% жадаюць абзавесціся сям'ёй і дзецьмі.

Чаканні. Пазітыўныя эканамічныя настроі сярод міленіялаў самыя нізкія за апошнія шэсць гадоў. Толькі 26% рэспандэнтаў заявілі, што чакаюць паляпшэння эканамічнай сітуацыі ў сваіх краінах, хоць доля аптымістаў ніколі не апускалася ніжэй за 40%, а апошнія два гады складала 45%, адзначае Deloitte.

Больш за палову міленіялаў уважаюць, што іх фінансавае становішча пагоршыцца ці не зменіцца ў наступным годзе, у той час як 43% чакаюць паляпшэнняў.

Стаўленне да бізнэсу. Апытанне паказала, што міленіялы ўсё горш думаюць пра бізнэсоўцаў, называючы зараблянне прыбылі іх асноўнай мэтай (так лічаць 55% апытаных). Кампаніі, на думку маладых, павінны надаваць больш увагі вытворчасці высакаякасных тавараў і паслуг (так лічаць 36% апытаных) і стварэнню працоўных месцаў (35% рэспандэнтаў).

Міленіялы і індустрыя 4.0. Міленіялы не баяцца лічбавых тэхналогій і актыўна працуюць з імі. 49% рэспандэнтаў мяркуюць, што новыя тэхналогіі павялічаць колькасць працоўных месцаў і толькі 15% асцерагаюцца страты працы праз іх. Кожны пяты рэспандэнт заявіў, што валодае ўсімі навыкамі для работы ва ўмовах індустрыі 4.0, а 70% лічаць, што ў іх ёсць толькі частка гэтых навыкаў і ім спатрэбіцца развіваць здольнасці, каб павысіць свой кошт на рынку.

Стаўленне да працы. Deloitte адзначыў трэнд, непрыемны для кампаній, якія шукаюць пастаянных і лаяльных работнікаў. 49% апытаных пры наяўнасці выбару хацелі б звольніцца ў найбліжэйшыя два гады са сваёй цяперашняй працы.

43% апытаных міленіялаў не задавальняе заробак, 35% хочуць больш магчымасцяў для прасоўвання і 28% не хапае прафесійнага росту. Характэрна, што 15% міленіялаў сказалі, што ў прынцыпе не падтрымліваюць рабочую культуру. Ёсць і абнадзейлівая навіна: 28% рэспандэнтаў хацелі б застацца ў сваіх цяперашніх працадаўцаў найбліжэйшыя пяць і больш гадоў.

Спажыванне. Не толькі якасць прадукту ўплывае на выбар кампаніі. У адрозненне ад папярэдняга пакалення міленіялы і пакаленне Z ацэньваюць этычнасць паводзін кампаніі і яе ўплыў на грамадства.

42% рэспандэнтаў сказалі, што пачалі або працягнулі свае адносіны з той ці іншай кампаніяй, таму што яе прадукты ці паслугі дзейнічаюць пазітыўна на грамадства і/ці на навакольнае асяроддзе. 37% спынілі абслугоўвацца ў кампаніі праз яе неэтычныя паводзіны.

Чвэрць рэспандэнтаў заявіла аб спыненні стасункаў з кампаній з палітычных матываў, а траціна - праз моцнае ўварванне ў асабістую прастору (кампаніям запытвае занадта шмат звестак).

Настроі. Deloitte палічыў індэкс аптымізму моладзі, і самы высокі ён атрымаўся ў Нігерыі (69 пунктаў з 100 магчымых), на другім месцы - Індыя (65 пунктаў) і замыкае тройку Кітай (61 пункт). Расея заняла 37-е месца з індэксам 25 пунктаў. На апошнім месцы - Турцыя (22 пункты).

Індэкс для ўсіх апытаных міленіялаў - 39 пунктаў. На рынках, якія развіваюцца, ён вышэйшы - 48 пунктаў, а на развітых ніжэйшы - 32 пункты. Індэкс улічвае пяць параметраў, уключаючы як асабісты фінансавы аптымізм, так і сацыяльна-палітычны.