Украіна падоўжыла эмбарга на тавары з Расеі
1- 16.07.2019, 10:44
- 7,769
Кабінет Міністраў Украіны ўвёў таксама новыя абмежаванні супраць РФ.
Украіна падоўжыла забарону на ўвоз расейскіх тавараў, уведзеную ў 2015 годзе ў адказ на расейскія абмежаванні. Адпаведная пастанова апублікаваная на сайце Кабінета Міністраў, паведамляе gordonua.com.
Кабмін унёс змены ў прынятую 30 снежня 2015 года пастанову пра забарону ўвозу ва Украіну расейскіх тавараў і падоўжыў дзеянне эмбарга да 31 снежня 2020 года.
Расея з 2016 года скасавала рэжым зоны свабоднага гандлю ў дачыненні да Украіны і ўвяла харчовае эмбарга. Гэтая пастанова кіраўніцтва РФ стала рэакцыяй на пачатак дзеяння з 1 студзеня зоны свабоднага гандлю паміж Украінай і Еўрапейскім Звязам. Украінскія ўлады ў адказ увялі люстраныя гандлёвыя санкцыі супраць РФ, якія штогод пераглядаюцца і дапаўняюцца.
10 красавіка 2019 года Кабінет Міністраў Украіны ўхваліў пашырэнне пераліку тавараў з Расеі, на пастаўку якіх ва Украіну ўведзенае эмбарга. У санкцыйны пералік унеслі банкі для кансервавання, фармалін, спружыны для калясак грузавых вагонаў і г.д.
У адказ на пастанову ўкраінскага Кабміна 18 красавіка на пасяджэнні ўрада прэм'ер-міністр РФ Дзмітрый Мядзведзеў заявіў, што Расея забараняе экспарт нафты і нафтапрадуктаў ва Украіну. Паводле ягоных словаў, з 1 чэрвеня нафту, нафтапрадукты і вугаль можна будзе завезці пры наяўнасці адпаведнага дазволу.
15 траўня Украіна ўвяла забарону на ўвоз расейскага цэменту і фанеры.